जळगाव (प्रतिनिधी) : सामाजिक न्याय व विशेष सहाय्य विभाग यांच्या वतीने देशभर राबविण्यात येत असलेल्या नशामुक्त भारत अभियान अंतर्गत दिनांक 18 नोव्हेंबर 2025 रोजी संत ज्ञानेश्वर प्राथमिक व माध्यमिक विद्यालयात विद्यार्थ्यांनी तसेच शिक्षकांनी ऑनलाइन शपथ ग्रहण केली.
या ऑनलाइन उपक्रमात विद्यार्थ्यांना नशेचे मानवावर होणारे दुष्परिणाम, तंबाखू, सिगारेट, गुटखा, मद्यपान यासह विविध व्यसनांचा आरोग्यावर होणारा नकारात्मक परिणाम याबाबत उपशिक्षिका शितल कोळी यांनी मार्गदर्शन केले. समाजात व्यसनमुक्त वातावरण निर्माण करण्यासाठी प्रत्येकाने सजग राहणे व व्यसनापासून स्वतः दूर राहणे किती महत्त्वाचे आहे, याची सविस्तर माहिती विद्यार्थ्यांना देण्यात आली.
यानंतर सर्व विद्यार्थ्यांनी— “नशा करणार नाही आणि इतरांनाही व्यसनमुक्त जीवन जगण्यासाठी प्रोत्साहित करू” —अशी शपथ उत्साहात ऑनलाइन पद्धतीने स्वीकारली.
यावेळी मुख्याध्यापक मुकेश नाईक यांनी विद्यार्थ्यांशी संवाद साधत आरोग्यदायी, सुसंस्कृत आणि व्यसनमुक्त जीवनाचे महत्त्व पटवून दिले. शाळेतील शिक्षक व गैरशिक्षक कर्मचारी यांनीही या उपक्रमात उत्स्फूर्त सहभाग नोंदविला.
या मोहिमेमुळे विद्यार्थ्यांमध्ये सामाजिक बांधिलकी, आरोग्यप्रेम आणि जबाबदारीची भावना वृद्धिंगत होत असून नशामुक्त भारत घडविण्यासाठी हे एक सकारात्मक पाऊल असल्याचे मत व्यक्त करण्यात आले.
