मेहरुण (प्रतिनिधी): विद्यार्थ्यांच्या अडचणी वेळेत समजून घेऊन त्यांचे तातडीने निराकरण व्हावे, विद्यार्थ्यांना निर्भयपणे आपले मत मांडता यावे तसेच पालकांनाही शाळेच्या गुणवत्ता विकासात सक्रिय सहभाग घेता यावा, या उद्देशाने संत ज्ञानेश्वर प्राथमिक व माध्यमिक विद्यालय, मेहरुण येथे “विद्यार्थी समस्या निवारण प्रणाली” आणि “पालक तक्रार व सूचना पेटी” या अभिनव उपक्रमांचा शुभारंभ करण्यात आला.
या उपक्रमांतर्गत शाळेत “माझी समस्या – माझे समाधान” ही विद्यार्थी समस्या पेटी तसेच “पालक तक्रार व सूचना पेटी” उपलब्ध करून देण्यात आली आहे. यामधून विद्यार्थी शैक्षणिक अडचणी, शिस्त, स्वच्छता, पिण्याचे पाणी, क्रीडा साहित्य, ग्रंथालय आदी विषयांवरील समस्या व सूचना नोंदवू शकतील. तसेच पालकही आपल्या पाल्याच्या शिक्षणाशी संबंधित अडचणी, शाळेतील सुविधा किंवा विधायक सूचना लेखी स्वरूपात पेटीत टाकू शकतील.
प्राप्त झालेल्या सूचना व तक्रारींवर विद्यार्थी संसद, शिक्षक, मुख्याध्यापक आणि आवश्यकतेनुसार पालक प्रतिनिधी यांच्या उपस्थितीत चर्चा करून योग्य ती कार्यवाही करण्यात येणार आहे. या प्रणालीमुळे विद्यार्थी, पालक आणि शाळा यांच्यातील संवाद अधिक प्रभावी होऊन शाळेच्या गुणवत्ता वृद्धीस चालना मिळणार असल्याचा विश्वास व्यक्त करण्यात आला.
यावेळी मुख्याध्यापक मुकेश सुरेश नाईक यांनी विद्यार्थी व पालकांना कोणतीही समस्या किंवा विधायक सूचना निःसंकोचपणे मांडण्याचे आवाहन केले. राष्ट्रीय शैक्षणिक धोरण (NEP-2020) आणि SQAAF च्या गुणवत्ता निकषांनुसार लोकसहभाग, पारदर्शकता आणि विद्यार्थी-केंद्रित व्यवस्थापनाला प्रोत्साहन देणारा हा उपक्रम ठरणार असल्याचे त्यांनी सांगितले.
विद्यालयाच्या या अभिनव उपक्रमाचे विद्यार्थी, पालक व शिक्षणप्रेमी नागरिकांकडून स्वागत करण्यात येत असून, विद्यार्थ्यांच्या सर्वांगीण विकासासाठी हा उपक्रम महत्त्वपूर्ण ठरणार असल्याचे मत व्यक्त केले जात आहे.
