जळगाव (प्रतिनिधी: सतीश राठोड):
भुसावळ येथील सराफ बाजारातील बन्सीलाल अग्रवाल ज्वेलर्स या दुकानातून हातचलाखीने सोन्याचे मंगळसूत्र आणि पेंडल चोरी करणाऱ्या महिलेला जळगाव स्थानिक गुन्हे शाखेच्या पथकाने अकोला येथून अटक केली आहे. या कारवाईत पोलिसांनी चोरीस गेलेले सुमारे ३ लाख रुपये किमतीचे सोन्याचे दागिने हस्तगत केले आहेत. स्थानिक गुन्हे शाखेच्या या कामगिरीमुळे सराफ बाजारातील चोरीच्या गुन्ह्याचा उलगडा झाला आहे.
सीसीटीव्ही आणि गोपनीय माहितीच्या आधारे तपास
पोलिसांनी दिलेल्या माहितीनुसार, ९ ऑक्टोबर २०२६ रोजी सकाळी १० ते १०.३० वाजेच्या सुमारास भुसावळ येथील सराफ बाजारातील बन्सीलाल अग्रवाल ज्वेलर्स या दुकानातून अज्ञात व्यक्तीने हातचलाखीने सोन्याचे मंगळसूत्र आणि सोन्याचे पेंडल चोरून नेले होते. या दागिन्यांची एकूण किंमत ३ लाख रुपये होती.
याप्रकरणी फिर्यादीच्या तक्रारीवरून १४ ऑक्टोबर रोजी भुसावळ बाजारपेठ पोलीस ठाण्यात गुन्हा रजिस्टर क्रमांक ५३५/२०२६ अन्वये भारतीय न्याय संहिता, २०२३ च्या कलम ३०५(अ) अंतर्गत गुन्हा दाखल करण्यात आला होता.
गुन्ह्याचे गांभीर्य लक्षात घेऊन जळगावचे पोलीस अधीक्षक श्रीकांत धिवरे यांनी स्थानिक गुन्हे शाखेला समांतर तपास करून गुन्हा उघडकीस आणण्याच्या सूचना दिल्या. त्यानुसार स्थानिक गुन्हे शाखेचे पोलीस निरीक्षक राहुल गायकवाड यांच्या नेतृत्वाखाली तपास पथक तयार करण्यात आले.
पथकाने घटनास्थळाची पाहणी करून परिसरातील सीसीटीव्ही फुटेज संकलित केले. तांत्रिक विश्लेषण आणि गोपनीय माहितीच्या आधारे तपास करत पोलिसांनी अकोला जिल्ह्यातील अकोट फाईल पोलीस ठाण्याच्या हद्दीत स्थानिक पोलिसांच्या मदतीने कारवाई केली. या कारवाईत मुमताज परविन अब्दुल (रा. नेहरू नगर, सोळाशे प्लॉट, अकोट फाईल, अकोला) या महिलेला ताब्यात घेण्यात आले.
पोलिसांनी केलेल्या चौकशीत संबंधित महिलेने गुन्ह्याची कबुली दिल्याचे प्रसिद्धीपत्रकात नमूद करण्यात आले आहे.
तीन लाखांचा मुद्देमाल हस्तगत
या कारवाईत पोलिसांनी खालील सोन्याचे दागिने हस्तगत केले आहेत.
– सोन्याचे मंगळसूत्र: वजन १४.५८० ग्रॅम, किंमत २ लाख ४० हजार रुपये.
– सोन्याचे पेंडल: एक नग, वजन ३.३१० ग्रॅम, किंमत ६० हजार रुपये.
अशा प्रकारे पोलिसांनी एकूण ३ लाख रुपये किमतीचा मुद्देमाल हस्तगत केला आहे.
वरिष्ठ अधिकाऱ्यांच्या मार्गदर्शनाखाली कारवाई
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि भुसावळ विभागाचे उपविभागीय पोलीस अधिकारी केदार बारबोले यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक राहुल गायकवाड यांच्या नेतृत्वाखालील पथकाने ही कामगिरी केली.
कारवाईतील पोलीस अधिकारी व कर्मचारी :
१. पोलीस उपनिरीक्षक संतोष पवार
२. पोलीस हेडकॉन्स्टेबल गोपाल गव्हाळे
३. पोलीस हेडकॉन्स्टेबल उमाकांत पाटील
४. पोलीस हेडकॉन्स्टेबल विकास सातदिवे
५. महिला पोलीस हेडकॉन्स्टेबल अश्विनी सावकारे
६. पोलीस हेडकॉन्स्टेबल संदीप चव्हाण
७. पोलीस कॉन्स्टेबल प्रशांत परदेशी
८. पोलीस कॉन्स्टेबल राहुल वानखेडे
९. वाहनचालक पोलीस कॉन्स्टेबल रिझवान शेख
या पथकाने सीसीटीव्ही फुटेज, तांत्रिक विश्लेषण आणि गोपनीय माहितीच्या आधारे तपासाची चक्रे फिरवत चोरीचा गुन्हा उघडकीस आणला. या कारवाईमुळे जळगाव स्थानिक गुन्हे शाखेच्या पथकाचे कौतुक होत आहे.
