मेहरुण (प्रतिनिधी) : गुरुपौर्णिमेच्या पावन पर्वानिमित्त श्री संत ज्ञानेश्वर प्राथमिक व माध्यमिक विद्यालय, मेहरुण येथे इयत्ता चौथीच्या विद्यार्थिनींनी पर्यावरण संवर्धनाचा अनोखा संदेश देत विद्यालयाचे पर्यावरणप्रेमी मुख्याध्यापक मुकेश सुरेश नाईक यांना आकर्षक इनडोअर वृक्ष भेट देऊन आगळीवेगळी गुरुदक्षिणा अर्पण केली. पारंपरिक भेटवस्तूंऐवजी हिरवाईची भेट देत विद्यार्थिनींनी “वृक्ष हीच खरी गुरुदक्षिणा” हा संदेश समाजासमोर प्रभावीपणे मांडला.
हा उपक्रम उपशिक्षिका स्वाती नाईक यांच्या मार्गदर्शनाखाली राबविण्यात आला. त्यांनी विद्यार्थिनींना गुरुपौर्णिमेचे महत्त्व तसेच पर्यावरण संवर्धनाची गरज समजावून सांगत हरित गुरुदक्षिणेची संकल्पना प्रत्यक्षात आणली.
विद्यालयात सातत्याने राबविण्यात येणारे ‘एक विद्यार्थी – एक वृक्ष’, ‘वृक्ष बँक’, बीज संकलन, वृक्षारोपण यांसारखे विविध हरित उपक्रम विद्यार्थ्यांमध्ये निसर्गप्रेम, पर्यावरणाबद्दलची जाणीव आणि सामाजिक जबाबदारीची भावना रुजवत आहेत. याच उपक्रमांच्या प्रेरणेतून विद्यार्थिनींनी गुरुपौर्णिमेच्या निमित्ताने हा अभिनव उपक्रम साकारला.
यावेळी मुख्याध्यापक मुकेश सुरेश नाईक यांनी विद्यार्थिनींचे कौतुक करत सांगितले की, “ही भेट केवळ एक रोप नसून विद्यार्थिनींच्या प्रेमाची, आदराची आणि पर्यावरणाविषयीच्या जागरूकतेची जिवंत आठवण आहे. अशा हरित गुरुदक्षिणेमुळे पर्यावरण संवर्धनाचा संदेश अधिक व्यापकपणे पोहोचेल.”
या उपक्रमामुळे गुरुपौर्णिमा उत्सवाला पर्यावरण संवर्धनाची अर्थपूर्ण जोड मिळाली. उपस्थित शिक्षक व पालकांनी विद्यार्थिनींच्या या अभिनव उपक्रमाचे उत्स्फूर्त कौतुक केले. “एक वृक्ष म्हणजे एक जीवन” हा संदेश कृतीतून देत इयत्ता चौथीच्या विद्यार्थिनींनी गुरुपौर्णिमा साजरी करण्याची प्रेरणादायी आणि पर्यावरणपूरक परंपरा जपली.
