जळगाव(प्रतिनिधी : सरिता महाजन):दि. 17 जुलै : जळगाव शहर वाहतूक शाखेतर्फे आज (17 जुलै) “झिरो फेटॅलिटी” मोहिमेअंतर्गत विशेष वाहतूक तपासणी मोहीम राबविण्यात आली. या मोहिमेत विविध वाहतूक नियमांचे उल्लंघन करणाऱ्या एकूण 191 वाहनचालकांवर कारवाई करण्यात आली असून 1 लाख 67 हजार 250 रुपयांचे ई-चलन करण्यात आले. त्यापैकी 3 हजार रुपये रोख दंड जागीच वसूल करण्यात आला.
या कारवाईत विनाहेल्मेट 61, विनापरवाना (लायसन्स) 56, अल्पवयीन चालक 3, अवैध प्रवासी वाहतूक 1, तीन प्रवासी (थ्री सीट) 4, मद्यप्राशन करून वाहन चालविणारा 1, विनासीट बेल्ट 6 तसेच इतर 63 प्रकरणांवर कारवाई करण्यात आली.
ही मोहीम जळगाव शहरातील बसस्थानक, कालिका माता मंदिर परिसर तसेच मानराज पार्क परिसरात राबविण्यात आली. सकाळी 10 ते 12 आणि सायंकाळी 5 ते 7 या वेळेत विशेष नाकाबंदी करून वाहनांची तपासणी करण्यात आली.
वाहतूक नियमांचे काटेकोर पालन करून अपघातमुक्त शहर घडविण्याच्या उद्देशाने ही कारवाई करण्यात आल्याची माहिती पोलीस निरीक्षक मोरेश्वर पेंदाम, शहर वाहतूक शाखा, जळगाव यांनी दिली.
