🌿 ग्रीन फाउंडेशनच्या सहकार्याने श्री संत ज्ञानेश्वर विद्यालयाची आयुक्त व महापौरांशी सकारात्मक चर्चा

मेहरूण (प्रतिनिधी): श्री संत ज्ञानेश्वर प्राथमिक व माध्यमिक विद्यालय, मेहरूणचे मुख्याध्यापक मुकेश नाईक यांनी ग्रीन फाउंडेशनचे अध्यक्ष विजय वाणी यांच्या समवेत जळगाव महानगरपालिकेचे आयुक्त व महापौर दीपमाला काळे यांची सदिच्छा भेट घेतली.

या भेटीत विद्यालयात राबविण्यात येत असलेल्या ‘वृक्ष बँक’, वृक्षारोपण, पर्यावरण संवर्धन, इंधन बचत जनजागृती तसेच विद्यार्थ्यांमध्ये पर्यावरणपूरक जीवनशैली रुजविण्यासाठी सुरू असलेल्या विविध नाविन्यपूर्ण उपक्रमांची सविस्तर माहिती देण्यात आली.

पर्यावरण संवर्धनासाठी शाळा, सामाजिक संस्था आणि प्रशासन यांनी समन्वयाने कार्य करण्याची आवश्यकता असल्याचे यावेळी अधोरेखित करण्यात आले. भविष्यात जळगाव शहरात पर्यावरण जनजागृती, वृक्षसंवर्धन आणि विद्यार्थी सहभाग वाढविण्यासाठी संयुक्तपणे विविध उपक्रम राबविण्याबाबत सकारात्मक चर्चा झाली.

विद्यालयाच्या पर्यावरणपूरक उपक्रमांचे आयुक्त व महापौर यांनी विशेष कौतुक करत अशा उपक्रमांना प्रशासनाच्या स्तरावर आवश्यक ते सहकार्य करण्याची ग्वाही दिली.

दरम्यान, महापौर दीपमाला काळे या पंढरपूर वारीसाठी सायकलद्वारे प्रस्थान करणार असल्याने पर्यावरण संवर्धनाचा संदेश अधिक व्यापक पातळीवर पोहोचावा, या उद्देशाने मुख्याध्यापक मुकेश नाईक यांच्या हस्ते त्यांना ५,००० बियाण्यांचे प्रतीकात्मक सुपूर्द करण्यात आले. या उपक्रमाचे उपस्थित मान्यवरांनीही मनापासून स्वागत केले.

यावेळी प्रेमचंद चौधरी, विजयकुमार वाणी, वासुदेव तळेले, डॉ. धनंजय बेंद्रे, अनिल शहा, नलिनी शहा, मनीषा पाटील, आशिष हाडा, डॉ. विजय बाविस्कर आदी मान्यवर उपस्थित होते.