जळगाव (प्रतिनिधी): जळगाव येथे लवकरच आयोजित करण्यात येणाऱ्या हिरवा अंकुर पर्यावरण महोत्सवा संदर्भात चर्चा करण्यासाठी हिरवा अंकुर फाउंडेशनच्या नलिनी शहा, निलय शहा तसेच ग्रीन फाउंडेशनचे विजय वाणी यांनी श्री संत ज्ञानेश्वर प्राथमिक व माध्यमिक विद्यालय, मेहरूण येथे सदिच्छा भेट दिली.
यावेळी विद्यालयाच्या इको क्लबतर्फे चिमुकल्या विद्यार्थ्यांनी मान्यवरांचे उत्साहपूर्ण स्वागत केले. पर्यावरण संवर्धनाचा संदेश देत विद्यार्थ्यांनी मान्यवरांना हजारो वृक्षबियाण्यांची पाकिटे भेट स्वरूपात देऊन त्यांचा सत्कार केला. विद्यार्थ्यांच्या या आगळ्यावेगळ्या उपक्रमाचे उपस्थित मान्यवरांनी विशेष कौतुक केले.
कार्यक्रमादरम्यान मान्यवरांनी विद्यार्थ्यांशी संवाद साधत वृक्षलागवड, जैवविविधतेचे संवर्धन आणि पर्यावरण संरक्षणाचे महत्त्व पटवून दिले. तसेच हिरवा अंकुर पर्यावरण महोत्सवाच्या माध्यमातून अधिकाधिक वृक्षलागवड करून पर्यावरण जनजागृतीसाठी सक्रिय सहभाग नोंदविण्याचे आवाहन केले.
या प्रसंगी विद्यालयाचे मुख्याध्यापक मुकेश नाईक, पर्यवेक्षिका शीतल कोळी तसेच सर्व शिक्षकवृंद उपस्थित होते. विद्यार्थ्यांच्या पर्यावरणपूरक उपक्रमामुळे कार्यक्रमाला विशेष उत्साहाचे वातावरण लाभले.
