जळगाव(प्रतिनिधी: सरिता महाजन) रामेश्वर कॉलनी येथील रोजी आज इंटरनॅशनल नॅचरोपॅथी ऑर्गनायझेशन, दिल्ली यांच्या वतीने मेहरुण येथील श्री संत ज्ञानेश्वर प्राथमिक व माध्यमिक विद्यालयात योग व संतुलित आहार विषयक मार्गदर्शन कार्यक्रम उत्साहात संपन्न झाला.
कार्यक्रमात प्रमुख मार्गदर्शक म्हणून उपस्थित असलेल्या डॉ. निशिगंधा नेमाडे यांनी विद्यार्थी व शिक्षकांना संतुलित आहाराचे महत्त्व, पौष्टिक अन्नाचे सेवन, तसेच निरोगी जीवनशैलीचे फायदे याविषयी सविस्तर मार्गदर्शन केले. त्यांनी दैनंदिन आहारात पौष्टिक घटकांचा समावेश करण्याचे आवाहन केले.
यावेळी डॉ. कार्तिकेय अट्रावलकर यांनी योगाचे महत्त्व अधोरेखित करत नियमित योगाभ्यासामुळे शारीरिक व मानसिक आरोग्यावर होणारे सकारात्मक परिणाम समजावून सांगितले. योगामुळे एकाग्रता, तंदुरुस्ती आणि मानसिक संतुलन कसे वाढते याची माहिती त्यांनी विद्यार्थ्यांना दिली.
कार्यक्रमादरम्यान विद्यार्थ्यांनी उत्स्फूर्तपणे विविध प्रश्न विचारून आपल्या शंकांचे निरसन करून घेतले. मार्गदर्शनाचा लाभ घेत उपस्थितांनी कार्यक्रमाला भरभरून प्रतिसाद दिला. या उपक्रमामुळे विद्यार्थ्यांमध्ये आरोग्य, योग आणि योग्य आहाराविषयी जागरूकता निर्माण झाली.
कार्यक्रमास विद्यालयाचे मुख्याध्यापक, १५ शिक्षकवृंद, शिक्षकेतर कर्मचारी तसेच सुमारे ३०० विद्यार्थी मोठ्या संख्येने उपस्थित होते.
