जळगाव, प्रतिनिधी : सरिता महाजन
नवीन शैक्षणिक वर्ष २०२६-२७ च्या प्रारंभी तसेच अधिक महिन्याचे औचित्य साधत मेहरूण येथील श्री संत ज्ञानेश्वर प्राथमिक व माध्यमिक विद्यालयात “आईचा सन्मान – संस्कारांचा अभिमान” हा अभिनव उपक्रम उत्साहात राबविण्यात आला.
शाळेच्या पहिल्याच दिवशी विद्यार्थ्यांनी आपल्या मातांचा सन्मान करत पारंपरिक पद्धतीने ओटी भरली. विशेष म्हणजे पर्यावरण संवर्धनाचा संदेश देण्यासाठी प्रत्येक मातेला ओटीमध्ये आंब्याचे बीज भेट देण्यात आले. या बीजांपासून रोपे तयार करून त्यांचे संगोपन करण्याचा संकल्प विद्यार्थ्यांनी आणि पालकांनी केला.
आई ही मुलांची पहिली गुरु असून तिच्या संस्कारातूनच विद्यार्थ्यांचे व्यक्तिमत्त्व घडते, हा संदेश या उपक्रमातून देण्यात आला. मातृसन्मानासोबतच वृक्षसंवर्धनाचा संदेश देणारा हा उपक्रम उपस्थित पालकांच्या विशेष पसंतीस उतरला.
यावेळी शाळेचे मुख्याध्यापक, शिक्षकवृंद, विद्यार्थी तसेच पालक मोठ्या संख्येने उपस्थित होते. मातृसन्मान, संस्कार आणि पर्यावरण संरक्षण यांचा सुंदर संगम घडवून आणणारा हा उपक्रम सर्वांसाठी प्रेरणादायी ठरला.
