जळगाव (प्रतिनिधी) : शहरातील समतानगरात एकच खळबळ! जुन्या वादातून यावल शहरात तरुणाला घेरून बेदम मारहाण करण्यात आली आणि त्यातील गंभीर जखमांमुळे उपचारादरम्यान त्याचा मृत्यू झाल्याची थरकाप उडवणारी घटना मंगळवार, दि. २ डिसेंबर रोजी मध्यरात्रीच्या सुमारास उघडकीस आली आहे.
तुषार चंद्रकांत तायडे (वय १८, रा. समतानगर, जळगाव) असे मृत तरुणाचे नाव असून, त्याच्या मृत्यूनंतर शासकीय रुग्णालयात नागरिकांची प्रचंड गर्दी उसळली.
अंत्यविधीवरून परतताना हल्ला!
काही महिन्यांपूर्वी तुषारचा काही तरुणांशी वाद झाल्याची माहिती समोर येत असून, याच रागातून हा हल्ला झाल्याची चर्चा जोरात आहे.
मंगळवारी तुषार आपल्या आजीच्या अंत्यविधीसाठी वड्डी परसाडे येथे गेला होता. विधी आटोपून तो जळगावकडे निघाला, पण प्रवास त्याच्यासाठी प्राणघातक ठरला.
घेरून राडा – तुषारचा आक्रोशपूर्ण फोन
संध्याकाळी ७ ते ८ वाजताच्या दरम्यान काही संशयित तरुणांनी त्याला रस्त्यातच थांबवून घेरले आणि बेदम मारहाण केली.
जखमी अवस्थेत तुषारने वडिलांना फोन करून, “बाबा, काही मुलं मला मारत आहेत!” असे सांगितल्याची माहिती उघड झाली असून, ती ऐकून त्यांचे हृदय पिळवटून गेले.
रुग्णालयात शरिर जखमी, वातावरण तापले
पाटाजवळ तुषार रक्तबंबाळ अवस्थेत आढळला. नागरिकांनी तातडीने यावल ग्रामीण रुग्णालयात नेले.
दोन्ही पायांना झालेल्या जबर मारामुळे तुषारची प्रकृती गंभीरच होती. तेथून त्याला जळगावच्या शासकीय वैद्यकीय महाविद्यालयात हलवण्यात आले. पण उपचार सुरू असताना तुषारचे हृदय थांबले… आणि तरुणाईचा आणखी एक जीव जुन्या वादांना बळी पडला.
शासकीय रुग्णालयात तुषारच्या मृत्यूची खबर कळताच नातेवाईक, मित्र आणि परिसरातील नागरिकांनी गर्दी केली. परिस्थिती तणावपूर्ण होण्याची शक्यता लक्षात घेऊन पोलिसांनी लगेचच बंदोबस्त उभारला.
संशयित आरोपी फरार – पोलिसांचा तपास वेगात
मारहाणीनंतर आरोपी फरार झाले असून, यावल पोलिस ठाण्यात खुनाचा गुन्हा दाखल करण्याची प्रक्रिया मध्यरात्रीपर्यंत सुरू होती.
निवडणुकांच्या पार्श्वभूमीवर घडलेल्या या खुनामुळे शहरातील कायदा-सुव्यवस्थेवर मोठे प्रश्नचिन्ह निर्माण झाले आहे.
