मुक्ताईनगर पोलिसांची गुटखा तस्करीविरोधात धडक कारवाई; १९.१३ लाखांचा मुद्देमाल जप्त

Spread the love

मुक्ताईनगर (प्रतिनिधी: अमृत सपकाळे):महाराष्ट्र शासनाने प्रतिबंधित केलेल्या गुटखा, सुगंधित पानमसाला व तंबाखूजन्य पदार्थांची वाहतूक करणाऱ्या वाहनावर मुक्ताईनगर पोलिसांनी धडक कारवाई केली. या कारवाईत एका आरोपीला अटक करण्यात आली असून, प्रतिबंधित पानमसाला, जर्दा तसेच बोलेरो पिकअप वाहन असा एकूण १९ लाख १३ हजार ५०० रुपयांचा मुद्देमाल जप्त करण्यात आला आहे.

पोलीस अधीक्षक श्रीकांत धिवरे यांनी जिल्ह्यातील अवैध धंद्यांविरोधात कठोर कारवाई करण्याच्या सूचना सर्व पोलीस ठाण्यांच्या प्रभारी अधिकाऱ्यांना दिल्या आहेत. त्यानुसार मुक्ताईनगर पोलीस ठाण्याचे पोलीस निरीक्षक आशिष आडसूळ यांना ६ ऑक्टोबर रोजी बोदवड चौफुली परिसरातून प्रतिबंधित गुटख्याची वाहतूक होणार असल्याची गोपनीय माहिती मिळाली.

माहितीच्या आधारे पोलिसांनी बोदवड चौफुली परिसरात विशेष पथक तैनात करून संशयित वाहनांची तपासणी सुरू केली. यावेळी महिंद्रा बोलेरो पिकअप (क्र. HR-84-1073) संशयास्पदरीत्या आढळून आले. पोलिसांनी वाहन थांबविण्याचा प्रयत्न केला असता चालकाने वाहन न थांबविता पुढे नेले. पोलिसांनी पाठलाग करून वाहन अडवून त्याची तपासणी केली असता त्यामध्ये मोठ्या प्रमाणात प्रतिबंधित पानमसाला व जर्दा आढळून आला.

असा मुद्देमाल जप्त

प्रिमियम राजनिवास सुगंधित पानमसाला – ६,७५० पाकिटे : ₹१०,१२,५००

प्रिमियम जेड एन-०१ जाफरानी जर्दा – ६,००० पाकिटे : ₹५,७६,०००

महिंद्रा बोलेरो पिकअप वाहन क्र. HR-84-1073 : ₹३,२५,०००

एकूण : ₹१९,१३,५००

या प्रकरणी मुक्ताईनगर पोलीस ठाण्यात गु.र.नं. ३९१/२०२६ अन्वये भा.न्या.सं. कलम १२३, २२३, २७४, २७५ तसेच अन्न सुरक्षा व मानके कायद्यातील संबंधित कलमांनुसार गुन्हा दाखल करण्यात आला आहे. याप्रकरणी शुभमसिंग विद्ययाराम (वय २५, रा. निनावा, ता. किरावली, जि. आग्रा, उत्तर प्रदेश) याला अटक करण्यात आली आहे.

जप्त केलेला गुटखा व पानमसाला कोठून आणण्यात आला, या तस्करीमागील मुख्य सूत्रधार कोण आहे तसेच या अवैध व्यवसायात आणखी कोणाचा सहभाग आहे, याचा पोलिसांकडून सखोल तपास सुरू आहे.

ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी नंदराज पाटील यांच्या मार्गदर्शनाखाली पोलीस निरीक्षक आशिष आडसूळ यांच्या नेतृत्वाखाली करण्यात आली. या कारवाईत पोलीस उपनिरीक्षक तुषार पाटील, पोलीस अंमलदार रविंद्र धनगर आणि पोलीस अंमलदार प्रशांत चौधरी यांनी सहभाग घेतला.

पोलीस प्रशासनाकडून प्रतिबंधित गुटखा, सुगंधित पानमसाला व तंबाखूजन्य पदार्थांची विक्री, साठवणूक आणि वाहतूक करणाऱ्यांविरुद्ध यापुढेही कठोर कारवाई करण्यात येणार असून, नागरिकांनी अशा प्रकारच्या अवैध व्यवहारांची माहिती पोलिसांना द्यावी, असे आवाहन करण्यात आले आहे.


Spread the love

या बातम्या देखील वाचा

रावेर पोलिसांची गांजा विक्रेत्यांवर धडक कारवाई! घरावर छापा टाकून...

जळगाव( प्रतिनिधी: हिरालाल राजपूत): जिल्ह्यात अंमली पदार्थांची अवैध विक्री आणि साठवणूक करणाऱ्यांविरोधात रावेर पोलिसांनी मोठी कारवाई केली आहे. पाल (ता. रावेर) येथे एका संशयिताच्या...

बोगस दिव्यांग प्रमाणपत्रधारक कर्मचाऱ्यांवर कारवाई करा; घेतलेले शासकीय लाभ...

जळगाव(प्रतिनिधी : राजू शेख): दि. १६ नोव्हेंबर : जिल्हा परिषद जळगाव अंतर्गत विविध विभागांत कार्यरत असलेल्या बोगस दिव्यांग प्रमाणपत्रधारक कर्मचाऱ्यांवर तातडीने बडतर्फी व निलंबनाची...

कानळदात भगवान बिरसा मुंडा जयंती उत्साहात साजरी पारंपरिक...

कानळदा (प्रतिनिधी: इमरान खान): (ता. जळगाव) : येथील गावकऱ्यांच्या वतीने १५ नोव्हेंबर रोजी आदिवासी समाजाचे महानायक भगवान बिरसा मुंडा यांची जयंती मोठ्या उत्साहात आणि...

संपादक - रजत शेख

Latest