आमोदा येथे तलाठ्याला १ हजारांची लाच घेताना पकडले; एसीबीची कारवाई

Spread the love

जळगाव (प्रतिनिधी: राजू शेख):शेताच्या सातबारा उताऱ्यावर कुपनलिकेची (बोअरवेल) नोंद घेऊन त्याचा उतारा देण्यासाठी ४ हजार रुपयांची लाच मागून त्यापैकी ३ हजार ५०० रुपये स्वीकारल्यानंतर उर्वरित १ हजार रुपये घेताना तलाठ्याला लाचलुचपत प्रतिबंधक विभागाने (एसीबी) रंगेहात पकडले. ही कारवाई मंगळवारी (६ ऑक्टोबर) यावल तालुक्यातील आमोदा येथील ग्रामपंचायत कार्यालयात करण्यात आली.

शैलेश अंकुश झोटे (वय ३८), तलाठी, सजा आमोदा, ता. यावल, जि. जळगाव, सध्या रा. रावेर, मूळ रा. मेहकर, जि. बुलढाणा असे कारवाई करण्यात आलेल्या तलाठ्याचे नाव आहे.

तक्रारदार शेतकऱ्याने सिंचनासाठी शेतात कुपनलिका केली होती. शासनाच्या योजनेअंतर्गत सोलर सिस्टीम बसविण्यासाठी सातबारा उताऱ्यावर कुपनलिकेची नोंद असणे आवश्यक असल्याने त्यांनी तलाठी शैलेश झोटे यांच्याकडे नोंद करण्यासाठी संपर्क साधला. त्यावेळी नोंद घेऊन उतारा देण्यासाठी तलाठ्याने ४ हजार रुपयांची लाच मागितल्याचा आरोप आहे. तक्रारदाराने यापूर्वी ३ हजार ५०० रुपये दिले होते.

त्यानंतर उर्वरित ५०० रुपये तसेच सातबारा उतारा देण्यासाठी अतिरिक्त ५०० रुपये, असे एकूण १ हजार रुपयांची मागणी केल्याची तक्रार ६ ऑक्टोबर रोजी जळगाव एसीबीकडे करण्यात आली.

तक्रारीची पंचांसमक्ष पडताळणी केल्यानंतर आमोदा ग्रामपंचायत कार्यालयात सापळा रचण्यात आला. यावेळी तलाठी शैलेश झोटे यांनी पंचांसमक्ष १ हजार रुपयांची लाचेची रक्कम स्वीकारताच एसीबीच्या पथकाने त्यांना ताब्यात घेतले.

या प्रकरणी फैजपूर पोलीस ठाण्यात भ्रष्टाचार प्रतिबंध अधिनियम, कलम ७ अन्वये गुन्हा दाखल करण्याची प्रक्रिया सुरू असून आरोपीला ताब्यात घेण्यात आले आहे.

कारवाई पोलीस उपअधीक्षक योगेश ठाकूर यांच्या नेतृत्वाखाली करण्यात आली. पर्यवेक्षण अधिकारी म्हणून पोलीस निरीक्षक स्मिता नवघरे यांनी काम पाहिले. सापळा पथकात पोलीस हवालदार सुनील वानखेडे, पोलीस कॉन्स्टेबल प्रणेश ठाकूर आणि पोलीस कॉन्स्टेबल मनोज पाटील यांचा समावेश होता.

या कारवाईसाठी लाचलुचपत प्रतिबंधक विभागाचे पोलीस अधीक्षक भारत तांगडे, अपर पोलीस अधीक्षक प्रदीप मैराळे आणि अपर पोलीस अधीक्षक कविता फडतरे यांचे मार्गदर्शन लाभले.


Spread the love

या बातम्या देखील वाचा

रावेर पोलिसांची गांजा विक्रेत्यांवर धडक कारवाई! घरावर छापा टाकून...

जळगाव( प्रतिनिधी: हिरालाल राजपूत): जिल्ह्यात अंमली पदार्थांची अवैध विक्री आणि साठवणूक करणाऱ्यांविरोधात रावेर पोलिसांनी मोठी कारवाई केली आहे. पाल (ता. रावेर) येथे एका संशयिताच्या...

बोगस दिव्यांग प्रमाणपत्रधारक कर्मचाऱ्यांवर कारवाई करा; घेतलेले शासकीय लाभ...

जळगाव(प्रतिनिधी : राजू शेख): दि. १६ नोव्हेंबर : जिल्हा परिषद जळगाव अंतर्गत विविध विभागांत कार्यरत असलेल्या बोगस दिव्यांग प्रमाणपत्रधारक कर्मचाऱ्यांवर तातडीने बडतर्फी व निलंबनाची...

कानळदात भगवान बिरसा मुंडा जयंती उत्साहात साजरी पारंपरिक...

कानळदा (प्रतिनिधी: इमरान खान): (ता. जळगाव) : येथील गावकऱ्यांच्या वतीने १५ नोव्हेंबर रोजी आदिवासी समाजाचे महानायक भगवान बिरसा मुंडा यांची जयंती मोठ्या उत्साहात आणि...

संपादक - रजत शेख

Latest