जळगाव (प्रतिनिधी इमरान खान) :शहरातील विमानतळ परिसरातून रिक्षाने प्रवास करताना प्रवाशाचा रिक्षात राहून गेलेला मोबाईल रिक्षाचालकाने प्रामाणिकपणे परत केला. या घटनेमुळे रिक्षाचालकाच्या माणुसकीचे आणि प्रामाणिकपणाचे कौतुक होत आहे.
कुसुंबा येथील रहिवासी रामदास प्रकाश पाटील हे रिक्षाचालक आहेत. त्यांनी जळगाव विमानतळ येथून सुरत येथील रहिवासी रुपचंद खलनानी यांना रिक्षातून प्रवासासाठी नेले होते. प्रवासादरम्यान खलनानी यांचा मोबाईल रिक्षामध्येच राहून गेला.
मोबाईल रिक्षामध्ये आढळल्यानंतर रामदास पाटील यांनी तो स्वतःकडे न ठेवता पो.हे.कॉ. गजानन अर्जुन महाजन यांच्या मदतीने संबंधित प्रवाशाशी संपर्क साधून मोबाईल परत केला.
हरवलेला मोबाईल परत मिळाल्याने रुपचंद खलनानी यांनी रिक्षाचालक रामदास पाटील यांचे आभार मानले. त्यांच्या प्रामाणिकपणाचे आणि माणुसकीच्या भावनेचे कौतुक होत आहे.
