पाथर्डी (प्रतिनिधी: अमीर शेख) : २० सप्टेंबर २०२६
पाथर्डी तालुक्यातील बोरुडे मळा परिसरात अवैध वाळू वाहतुकीविरोधात स्थानिक गुन्हे शाखेने (LCB) कारवाई करत JCB, डंपर आणि वाळूसह तब्बल ४० लाख ४० हजार रुपयांचा मुद्देमाल जप्त केला. या कारवाईत एका तरुणाला ताब्यात घेण्यात आले असून, वाहनमालक असल्याचे पोलिसांनी सांगितलेल्या व्यक्तीचा शोध सुरू आहे.
पोलिसांनी दिलेल्या माहितीनुसार, उमेश विष्णू कचरे (वय २२, रा. पाडळी, ता. पाथर्डी) याला ताब्यात घेण्यात आले. तर JCB आणि डंपरचा मालक असल्याचे सांगितलेला नारायण बोरुडे हा फरार असल्याची माहिती पोलिसांनी दिली आहे.
४०.४० लाखांचा मुद्देमाल जप्त
कारवाईदरम्यान पोलिसांनी खालील मुद्देमाल जप्त केला :
– JCB — अंदाजे २५ लाख रुपये
– Tata डंपर — अंदाजे १५ लाख रुपये
– वाळू — अंदाजे ४० हजार रुपये
अशा प्रकारे एकूण ४० लाख ४० हजार रुपयांचा मुद्देमाल जप्त करण्यात आला.
पोलिसांच्या माहितीनुसार, संबंधित वाळू वाहतुकीसाठी आवश्यक परवाना नसल्याचे चौकशीत समोर आले.
पाथर्डी पोलीस ठाण्यात गुन्हा दाखल
या प्रकरणी पाथर्डी पोलीस ठाण्यात गु.र.नं. ११५१/२०२६ अन्वये भारतीय न्याय संहितेतील कलम ३०३(२), ३(५) तसेच पर्यावरण कायद्यातील कलम ३, १५ अंतर्गत गुन्हा दाखल करण्यात आला आहे. प्रकरणाचा पुढील तपास पोलीस करत आहेत.
ही कारवाई पोलीस अधीक्षक मुम्मका सुदर्शन यांच्या मार्गदर्शनाखाली स्थानिक गुन्हे शाखेचे पोलीस निरीक्षक संतोष मुटकुळे व त्यांच्या पथकाने केल्याची माहिती आहे.
अवैध वाळू उत्खनन आणि वाहतुकीविरोधात करण्यात आलेल्या या कारवाईमुळे तालुक्यातील वाळू वाहतूक करणाऱ्यांमध्ये खळबळ उडाली आहे.
