मेहरुण (प्रतिनिधी: सरिता महाजन): मेहरुण येथील श्री संत ज्ञानेश्वर प्राथमिक व माध्यमिक विद्यालयात स्वर्गीय अजितदादा पवार यांच्या जयंतीनिमित्त अभिवादनाचा कार्यक्रम उत्साहात संपन्न झाला. कार्यक्रमाच्या प्रारंभी त्यांच्या प्रतिमेला पुष्पहार अर्पण करून दीपप्रज्वलन करण्यात आले. उपस्थितांनी स्व. अजितदादा पवार यांच्या स्मृतींना विनम्र अभिवादन केले.
यावेळी विद्यार्थ्यांना स्व. अजितदादा पवार यांच्या सामाजिक, शैक्षणिक आणि लोकहिताच्या कार्याची माहिती देण्यात आली. त्यांच्या कार्यातून प्रामाणिकपणा, समाजसेवा, कर्तव्यनिष्ठा आणि सामाजिक बांधिलकीचे मूल्य आत्मसात करण्याचे आवाहन करण्यात आले.
विद्यालयाच्या पर्यवेक्षिका सौ. शितल कोळी यांनी स्व. अजितदादा पवार यांच्या कार्याचा आढावा घेत विद्यार्थ्यांनी त्यांच्या विचारांचे अनुकरण करून समाजहिताची जाणीव ठेवावी, असे सांगितले. मुख्याध्यापक श्री. मुकेश सुरेश नाईक यांनी जीवनात यश मिळवण्यासाठी मेहनत, शिस्त आणि सामाजिक जबाबदारी जोपासणे आवश्यक असल्याचा संदेश विद्यार्थ्यांना दिला.
या कार्यक्रमाला विद्यालयातील शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते. कार्यक्रमाचे सूत्रसंचालन व आभारप्रदर्शन विद्यालयातील शिक्षकांनी केले.
