जळगाव (प्रतिनिधी) : नशिराबाद पोलीस ठाण्याच्या हद्दीत १३ वर्षीय अल्पवयीन मुलीवर अत्याचार झाल्याची धक्कादायक घटना समोर आली आहे. चिकू खाण्याचे आमिष दाखवून मुलीला चिकूच्या बागेत नेऊन तिच्यावर लैंगिक अत्याचार केल्याप्रकरणी ४३ वर्षीय आरोपीला पोलिसांनी तात्काळ अटक केली आहे.
पोलिसांनी दिलेल्या माहितीनुसार, २० जुलै २०२६ रोजी दुपारी सुमारे ३ वाजता पीडित मुलगी घराजवळ खेळत होती. त्यावेळी आरोपी सुनील अर्जुनराव सावके (वय ४३) याने तिला चिकू खाण्याचे आमिष दाखवत जवळील चिकूच्या बागेत नेले. तेथे तिच्यावर लैंगिक अत्याचार केल्याचा आरोप आहे.
या घटनेनंतर पीडित मुलीच्या आईने २१ जुलै रोजी सायंकाळी नशिराबाद पोलीस ठाण्यात फिर्याद दाखल केली. फिर्याद मिळताच पोलिसांनी तत्काळ कारवाई करत आरोपीविरुद्ध गुन्हा दाखल करून त्याला अटक केली.
घटनेची गंभीर दखल घेत भुसावळ विभागाचे पोलीस उपविभागीय अधिकारी केदार बारबोले यांनी घटनास्थळी भेट देऊन तपासाचा आढावा घेतला. तपासात कायदेशीर प्रक्रियेनुसार ‘ई-साक्ष’ (डिजिटल पुरावा संकलन) प्रणालीचाही वापर करण्यात आला.
या प्रकरणी नशिराबाद पोलीस ठाण्यात गुन्हा क्रमांक २१२/२०२६ अन्वये भारतीय न्याय संहिता (BNS) २०२३ मधील कलम ६४, ६५ तसेच लैंगिक अपराधांपासून बालकांचे संरक्षण (पॉक्सो) कायद्यातील कलम ४, ६, ८ व १२ नुसार गुन्हा दाखल करण्यात आला आहे.
सहाय्यक पोलीस निरीक्षक योगिता नारखेडे यांच्या मार्गदर्शनाखाली पोलीस उपनिरीक्षक विजय कोळी या प्रकरणाचा पुढील तपास करीत आहेत.
