जळगाव(प्रतिनिधी: इमरान खान):
धुळे जिल्ह्यातील देवपूर पोलीस ठाण्यात दाखल असलेल्या घरफोडीच्या गुन्ह्यातील फरार दोन आरोपींना जळगावच्या रामानंद नगर पोलिसांनी शिताफीने अटक करून मोठी कामगिरी बजावली आहे. आरोपींकडून गुन्ह्याची कबुली मिळाल्यानंतर त्यांना पुढील तपासासाठी देवपूर पोलिसांच्या ताब्यात देण्यात आले आहे.
मिळालेल्या माहितीनुसार, दि. २९ मे २०२६ रोजी देवपूर पोलीस ठाण्यात CCTNS गुन्हा क्र. १९५/२०२६, भारतीय न्याय संहिता (BNS) कलम ३०५(अ), ३३१(३) व ३३१(४) अन्वये घरफोडीचा गुन्हा दाखल करण्यात आला होता. या घरफोडीत अज्ञात चोरट्यांनी ३९ ग्रॅम सोन्याचे दागिने व १९ भार चांदीचे दागिने लंपास केले होते.
या गुन्ह्याचा तपास सुरू असताना रामानंद नगर पोलीस ठाण्याचे पोलीस हवालदार सुधाकर अंभोरे व सुशील चौधरी यांना मिळालेल्या गोपनीय माहितीच्या आधारे जळगाव शहरातील राजीव गांधी नगर येथील राहुल सतीश लोंढे (वय २०) व ओम भरत लोंढे (वय १८) यांनी ही घरफोडी केल्याची खात्रीशीर माहिती मिळाली.
ही माहिती मिळताच पोलीस निरीक्षक मधुकर साळवे यांच्या मार्गदर्शनाखाली वरिष्ठ अधिकाऱ्यांच्या सूचनेनुसार रामानंद नगर पोलिसांनी सापळा रचून दोन्ही आरोपींना शिताफीने ताब्यात घेतले.
सखोल चौकशीत दोन्ही आरोपींनी घरफोडीची कबुली दिली. त्यानंतर पुढील तपास व कायदेशीर कारवाईसाठी आरोपींना देवपूर पोलीस ठाण्याचे सहायक पोलीस निरीक्षक राऊत यांच्या ताब्यात सुपूर्द करण्यात आले.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे यांच्या मार्गदर्शनाखाली पोलीस निरीक्षक मधुकर साळवे, पोलीस हवालदार सुधाकर अंभोरे, सुशील चौधरी व अतुल चौधरी यांनी यशस्वीरीत्या पार पाडली.
