जळगाव(प्रतिनिधी: इमरान खान) : एमआयडीसी पोलीस ठाण्याच्या पथकाने जळगाव शहरातील पिरजादे वाडा परिसरात छापा टाकून 80 किलो गोमांस जप्त केले असून या प्रकरणी चार आरोपींना ताब्यात घेण्यात आले आहे. आरोपींकडून गोमांसासह मांस कापण्यासाठी वापरण्यात येणारे साहित्य जप्त करण्यात आले असून त्यांच्याविरुद्ध महाराष्ट्र प्राणी संरक्षण अधिनियमांतर्गत गुन्हा दाखल करण्यात आला आहे.
पोलीस उपनिरीक्षक चंद्रकांत पुंडलीक धनके यांना मिळालेल्या गोपनीय माहितीच्या आधारे जामा मशिदीसमोरील पत्र्याच्या शेडमध्ये गोमांस विक्री सुरू असल्याची माहिती मिळाली. वरिष्ठ पोलीस निरीक्षक बबन आव्हाड यांच्या आदेशानुसार पंचांसह पोलिस पथकाने घटनास्थळी छापा टाकला.
छाप्यामध्ये युसुफ खान इस्माईल खान (वय 52, रा. लक्ष्मीनगर, दत्तनगर मेहरुण), शफी शेख बाबुलाल कुरेशी (वय 52, रा. तांबापुरा), शेख मुख्तार शेख बिस्मिल्ला (वय 42, रा. तांबापुरा) आणि शेख रईस शेख मुनाफ (वय 40, रा. नवी कॉलनी, पाळधी) हे गोमांस विक्री करताना आढळून आले.
पोलिसांनी घटनास्थळावरून 16 हजार रुपये किमतीचे 80 किलो गोमांस, 600 रुपये किमतीचे सहा लोखंडी सुरे, 100 रुपये किमतीची कुऱ्हाड आणि 200 रुपये किमतीचा वजनकाटा असा एकूण 16 हजार 900 रुपयांचा मुद्देमाल जप्त केला.
या प्रकरणी पोलीस अंमलदार अफजल रफियोद्दीन बागवान यांच्या फिर्यादीवरून एमआयडीसी पोलीस ठाण्यात सीसीटीएनएस क्रमांक 636/2026 अन्वये महाराष्ट्र प्राणी संरक्षण अधिनियम कलम 5(क) व 9(अ) अंतर्गत गुन्हा दाखल करण्यात आला आहे. प्रकरणाचा पुढील तपास पोलीस कर्मचारी दीपक महाजन करीत आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे आणि पोलीस निरीक्षक बबन आव्हाड यांच्या मार्गदर्शनाखाली करण्यात आली. कारवाईत पोलीस हेड कॉन्स्टेबल प्रमोद लाडवंजारी, रामकृष्ण पाटील, धनराज गुळवे, पोलीस नाईक मोतीलाल बोरसे, पोलीस कॉन्स्टेबल गणेश ठाकरे तसेच किरण पाटील, राहुल घेटे आणि नितीन ठाकूर यांनी सहभाग घेतला.
