जळगाव (प्रतिनिधी) : जळगाव शहरातील विविध महाविद्यालय परिसरात वाहतूक नियमांचे पालन व्हावे आणि अल्पवयीनांकडून होणारे वाहन चालविण्याचे प्रकार रोखावेत यासाठी वाहतूक शाखेकडून विशेष मोहीम राबविण्यात आली. या मोहिमेदरम्यान वाहनांची तपासणी करून नियमांचे उल्लंघन करणाऱ्या चालकांवर कारवाई करण्यात आली.
या कारवाईत तब्बल २४ अल्पवयीन वाहनचालक आढळून आले. संबंधित विद्यार्थ्यांच्या पालकांना बोलावून वाहतूक नियमांचे महत्त्व समजावून सांगण्यात आले तसेच भविष्यात अशा प्रकारची पुनरावृत्ती होऊ नये याबाबत समुपदेशन करण्यात आले.
याशिवाय विविध वाहतूक नियमांचे उल्लंघन करणाऱ्या वाहनचालकांविरुद्ध एकूण १,४७,००० रुपयांचा दंड आकारण्यात आला. त्यापैकी ८२,००० रुपये ऑन-द-स्पॉट वसूल करण्यात आले. तसेच ११९ ई-चलनही जारी करण्यात आले.
ही विशेष कारवाई प्रोबेशनरी डीवायएसपी सह्याद्री बिरसे आणि प्रशांत दरेकर यांनी पोलीस निरीक्षक (वाहतूक) यांच्या मार्गदर्शनाखाली केली. वाहतूक पोलिसांच्या या मोहिमेमुळे महाविद्यालय परिसरात वाहतूक शिस्तीबाबत जनजागृती होण्यास मदत झाली असून नियमभंग करणाऱ्यांमध्ये चांगलाच धाक निर्माण झाला आहे.
