लातूर, दि. १६ (प्रतिनिधी) : नागरिक आणि पोलीस यांच्यातील संवाद अधिक सशक्त करण्यासाठी तसेच नागरिकांच्या समस्या त्यांच्या परिसरातच ऐकून त्यांचे तात्काळ निराकरण करण्याच्या उद्देशाने लातूर जिल्हा पोलीस दलाने “पोलीस आपल्या सोसायटीमध्ये” हा अभिनव उपक्रम सुरू केला आहे. पोलीस अधीक्षक अमोल तांबे यांच्या संकल्पनेतून राबविण्यात येत असलेल्या या उपक्रमाला पहिल्याच दिवशी नागरिकांचा उत्स्फूर्त प्रतिसाद लाभला.
शहरी भागातील नागरिकांना किरकोळ समस्या, वाहतूक कोंडी, सुरक्षितता, महिला सुरक्षा, ज्येष्ठ नागरिकांच्या अडचणी, शेजारी वाद, पार्किंग समस्या तसेच कायदा व सुव्यवस्थेसंदर्भातील प्रश्नांसाठी पोलीस ठाण्यापर्यंत जाण्याची गरज भासू नये, यासाठी पोलीस अधिकारी थेट सोसायट्यांमध्ये जाऊन नागरिकांशी संवाद साधत आहेत. या उपक्रमामुळे नागरिक आणि पोलीस यांच्यातील दरी कमी होऊन परस्पर विश्वास अधिक दृढ होत असल्याचे चित्र दिसून आले.
दि. १५ जूनपासून सुरू झालेल्या या उपक्रमांतर्गत लातूर शहरासह उदगीर, अहमदपूर, औसा, निलंगा, चाकूर आणि जिल्ह्यातील इतर शहरी भागांमध्ये संबंधित पोलीस ठाण्यांचे प्रभारी अधिकारी, बीट अधिकारी आणि बीट अंमलदार यांनी विविध सोसायट्यांना भेटी दिल्या. यावेळी मोठ्या संख्येने नागरिक उपस्थित राहून आपल्या समस्या, सूचना आणि अपेक्षा पोलीस प्रशासनासमोर मांडल्या.
नागरिकांनी परिसरातील वाहतूक व्यवस्था, सुरक्षाविषयक उपाययोजना, संशयास्पद हालचाली, सीसीटीव्ही यंत्रणा, महिला व ज्येष्ठ नागरिकांची सुरक्षितता तसेच सार्वजनिक ठिकाणांवरील विविध समस्यांबाबत चर्चा केली. अनेक ठिकाणी प्राप्त झालेल्या तक्रारी आणि सूचनांवर तात्काळ कार्यवाही करण्याच्या सूचना संबंधित अधिकाऱ्यांना देण्यात आल्या असून काही समस्यांचे जागेवरच निराकरण करण्यात आले.
या उपक्रमाचे आणखी एक वैशिष्ट्य म्हणजे प्रत्येक नागरिकाला त्यांच्या पोलीस ठाण्याचे प्रभारी अधिकारी, बीट अधिकारी आणि बीट अंमलदार यांची माहिती व संपर्क क्रमांक उपलब्ध करून देण्यात येत आहेत. त्यामुळे कोणत्याही आपत्कालीन परिस्थितीत नागरिकांना संबंधित अधिकाऱ्यांशी थेट संपर्क साधणे अधिक सुलभ होणार आहे.
“पोलीस हे जनतेचे मित्र आहेत” हा संदेश प्रत्यक्ष कृतीतून अधोरेखित करणारा हा उपक्रम नागरिकाभिमुख पोलीसिंगचा आदर्श नमुना ठरत असल्याची भावना नागरिकांनी व्यक्त केली. नागरिकांच्या समस्या त्यांच्या दारी जाऊन ऐकून घेणारी आणि त्यावर तत्परतेने उपाययोजना करणारी पोलीस यंत्रणा ही लोकाभिमुख प्रशासनाची प्रभावी ओळख बनत असल्याचेही यावेळी स्पष्ट झाले.
दरम्यान, लातूर जिल्हा पोलीस दलाने सर्व नागरिकांना या उपक्रमात सक्रिय सहभाग घेण्याचे आवाहन केले असून आपल्या परिसरातील समस्या, सूचना आणि अपेक्षा मांडून या उपक्रमाचा लाभ घेण्याचे आवाहन केले आहे. नागरिकांच्या वाढत्या प्रतिसादामुळे हा उपक्रम भविष्यात अधिक व्यापक स्वरूपात राबविण्यात येणार असून पोलीस-जनता संबंध अधिक दृढ करण्यासाठी तो महत्त्वाची भूमिका बजावणार असल्याचे पोलीस प्रशासनाने सांगितले.
