जळगाव(प्रतिनिधी : इमरान खान): जळगाव शहरातून एक धक्कादायक घटना समोर आली आहे. शहरातील शिव कॉलनी येथील एका शाळेच्या परिसरात नूरी किन्नर या जखमी अवस्थेत आढळून आल्या. त्यांच्या गळ्यावर धारदार शस्त्राने वार झाल्याच्या खुणा असल्याची माहिती समोर येत आहे. घटनेनंतर त्यांना तातडीने उपचारासाठी जळगाव येथील जिल्हा शासकीय वैद्यकीय महाविद्यालय व रुग्णालयात (सिव्हिल हॉस्पिटल) दाखल करण्यात आले असून त्यांच्यावर उपचार सुरू आहेत.
मिळालेल्या माहितीनुसार, शिव कॉलनी परिसरातील शाळेच्या आवारात नूरी किन्नर या रक्ताच्या थारोळ्यात पडलेल्या अवस्थेत आढळल्या. ही बाब निदर्शनास येताच परिसरात एकच खळबळ उडाली. स्थानिक नागरिकांनी तातडीने मदतीसाठी धाव घेत त्यांना रुग्णालयात हलविले.
नूरी किन्नर यांच्या गळ्यावर धारदार शस्त्रामुळे जखम झाल्याचे प्राथमिक माहितीतून समोर येत आहे. मात्र, त्यांच्यावर हा हल्ला नेमका कोणी केला, की या घटनेमागे अन्य काही कारण आहे, याबाबत अद्याप कोणतीही अधिकृत माहिती समोर आलेली नाही.
घटना नेमक्या कोणत्या परिस्थितीत घडली याबाबतही सध्या स्पष्टता नसून पोलिस तपासानंतरच संपूर्ण सत्य समोर येण्याची शक्यता आहे. पोलिसांकडून परिसरातील नागरिकांची चौकशी तसेच उपलब्ध पुरावे आणि सीसीटीव्ही फुटेजची तपासणी केली जाऊ शकते.
दरम्यान, नूरी किन्नर यांच्यावर जिल्हा शासकीय रुग्णालयात उपचार सुरू असून त्यांच्या प्रकृतीबाबत अधिकृत माहितीची प्रतीक्षा आहे. या घटनेमुळे शहरात विविध चर्चांना उधाण आले असून पोलिसांच्या तपासाकडे सर्वांचे लक्ष लागले आहे.
