मेहरुण (प्रतिनिधी) : विद्यार्थ्यांमध्ये खरी मैत्री, निरोगी जीवनशैली आणि व्यसनमुक्त समाजाची जाणीव निर्माण करण्याच्या उद्देशाने श्री संत ज्ञानेश्वर प्राथमिक व माध्यमिक विद्यालय, मेहरुण येथे फ्रेंडशिप डे निमित्त “मैत्रीचा हात – नशामुक्त भारताकडे वाटचाल” हा अभिनव उपक्रम उत्साहात पार पडला. शाळा व्यवस्थापन समितीच्या पुढाकारातून तसेच आरोग्य व स्वास्थ्य समितीच्या सहकार्याने या उपक्रमाचे आयोजन करण्यात आले.
उपक्रमाची सुरुवात विद्यार्थ्यांनी एकमेकांच्या हातात फ्रेंडशिप बँड बांधून “माझा मित्र – नशामुक्त मित्र” हा संदेश देत केली. त्यानंतर विद्यार्थी, शिक्षक, पालक आणि शाळा व्यवस्थापन समितीच्या सदस्यांनी सामूहिकरीत्या नशामुक्तीची शपथ घेत “व्यसनाला नकार, निरोगी जीवनाला स्वीकार” हा सामाजिक संदेश दिला.
यावेळी विद्यार्थ्यांनी नशामुक्ती विषयक घोषवाक्ये सादर करत व्यसनांच्या दुष्परिणामांवर आपली मते व्यक्त केली. “खरी मैत्री तीच, जी मित्राला चुकीच्या सवयींपासून दूर ठेवते,” हा प्रभावी संदेशही विद्यार्थ्यांनी दिला. या उपक्रमातून विद्यार्थ्यांमध्ये सामाजिक बांधिलकी, सकारात्मक विचार, परस्पर सहकार्य, जीवनमूल्ये आणि निरोगी जीवनशैलीची जाणीव अधिक दृढ झाली.
उपक्रमाचे नियोजन आरोग्य व स्वास्थ्य समितीच्या प्रमुख उपशिक्षिका उज्वला नन्नवरे यांनी केले. त्यांनी विद्यार्थ्यांना व्यसनांपासून दूर राहण्याचे, आरोग्यदायी सवयी अंगीकारण्याचे आणि मित्रपरिवारालाही नशामुक्त जीवनासाठी प्रेरित करण्याचे आवाहन केले.
यावेळी मुख्याध्यापक मुकेश सुरेश नाईक यांनी मार्गदर्शन करताना सांगितले की, “खरा मित्र तोच, जो आपल्या मित्राला चुकीच्या मार्गापासून दूर ठेवून चांगल्या संस्कारांची वाट दाखवतो. व्यसनमुक्त युवा हीच सक्षम आणि सशक्त भारताची खरी ताकद आहे.”
कार्यक्रमास शाळा व्यवस्थापन समितीचे अध्यक्ष, सर्व सदस्य, पालक-शिक्षक संघाचे पदाधिकारी, पालक तसेच शिक्षक मोठ्या संख्येने उपस्थित होते. उपस्थितांनी या उपक्रमाचे स्वागत करत विद्यार्थ्यांमध्ये व्यसनमुक्ती, सुदृढ मैत्री, सामाजिक उत्तरदायित्व आणि राष्ट्रप्रेमाची भावना जोपासणाऱ्या या उपक्रमाचे विशेष कौतुक केले.
राष्ट्रीय शैक्षणिक धोरण (NEP-2020), आरोग्य शिक्षण तसेच SQAAF अंतर्गत विद्यार्थी सहभाग, जीवनकौशल्ये आणि मूल्याधारित शिक्षणाला चालना देणारा हा उपक्रम विद्यार्थ्यांसाठी प्रेरणादायी ठरल्याचे मत उपस्थितांनी व्यक्त केले.
