पाचोरा (प्रतिनिधी) : पाचोरा पोलीस ठाण्याच्या गुन्हे पथकाने वाहनचोरीच्या गुन्ह्यांचा यशस्वी छडा लावत मास्टर कीच्या सहाय्याने मोटारसायकली चोरणाऱ्या अट्टल चोरट्याला अटक केली. आरोपीकडून चोरीच्या चार बजाज प्लॅटिना मोटारसायकली जप्त करण्यात आल्या असून त्यांची एकूण किंमत 1 लाख 20 हजार रुपये आहे.
जिल्ह्यात तसेच पाचोरा शहरात वाढत्या वाहनचोरीच्या घटनांच्या पार्श्वभूमीवर पोलीस अधीक्षक श्रीकांत धिवरे यांच्या सूचनेनुसार पोलीस निरीक्षक राहुलकुमार पवार यांच्या नेतृत्वाखाली वाहनचोरीच्या गुन्ह्यांचा तपास सुरू होता. दरम्यान, पोलिसांना मिळालेल्या गोपनीय माहितीच्या आधारे आरोपी अमोल राजेंद्र ढमाळे (वय 27, रा. नंदीचे खेडगाव, ता. पाचोरा, ह.मु. काळे नगर, जळगाव) हा जळगाव रोडलगत एका शेतातील शेडमध्ये लपून राहत असल्याचे समजले.
पोलिसांनी सापळा रचून आरोपीला ताब्यात घेतले. चौकशीदरम्यान त्याने मास्टर कीच्या सहाय्याने चार बजाज प्लॅटिना मोटारसायकली चोरी केल्याची कबुली दिली. त्यानंतर त्याच्या ताब्यातून चोरीच्या चारही मोटारसायकली जप्त करण्यात आल्या.
या मोटारसायकलींची चोरी झाल्याप्रकरणी पाचोरा, भडगाव आणि एमआयडीसी वाळूज (छत्रपती संभाजीनगर) पोलीस ठाण्यांमध्ये बीएनएस कलम 303(2) अंतर्गत गुन्हे दाखल आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक अशोक नखाते आणि उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार यांच्या नेतृत्वात सपोनि प्रदीप शेवाळे, पोउपनिरीक्षक कृष्णा घायाळ तसेच गुन्हे पथकातील अधिकारी व कर्मचाऱ्यांनी यशस्वीरीत्या पार पाडली.
