जळगाव (प्रतिनिधी):
जळगाव शहर वाहतूक शाखेतर्फे २४ जुलै २०२६ रोजी राबविण्यात आलेल्या ‘झीरो फेटालिटी’ विशेष मोहिमेत वाहतूक नियमांचे उल्लंघन करणाऱ्या वाहनचालकांवर मोठी कारवाई करण्यात आली. या मोहिमेत एकूण १२४ प्रकरणे नोंदवून १ लाख ७१ हजार १०० रुपयांचा दंड आकारण्यात आला.
कारवाईदरम्यान १८ अल्पवयीन चालक, ३४ विनापरवाना वाहनचालक, ४ तीन आसनी उल्लंघन (थ्री-सीट), १० विना सीटबेल्ट तसेच इतर ५८ वाहतूक नियमभंगाच्या प्रकरणांवर कारवाई करण्यात आली.
ही मोहीम जळगाव शहरातील इच्छादेवी चौक, देविदास कॉलनी, न्यू जोशी कॉलनी आणि सिंधी कॉलनी परिसरात नाकाबंदी करून राबविण्यात आली. विशेषतः अल्पवयीन चालक आणि फ्रेंडशिप रिक्षांवर लक्ष केंद्रित करून तपासणी करण्यात आली.
या मोहिमेचे नेतृत्व शहर वाहतूक शाखेचे पोलीस निरीक्षक मोरेश्वर पेंदाम यांनी केले. त्यांच्यासह पोलीस उपनिरीक्षक (पीएसआय) गांगुर्डे आणि इतर दहा पोलीस अंमलदारांनी कारवाईत सहभाग घेतला.
आकारण्यात आलेल्या दंडापैकी ५ हजार ५०० रुपये दंड घटनास्थळीच वसूल करण्यात आला. भविष्यातही वाहतूक नियमांचे काटेकोर पालन व्हावे आणि अपघातांचे प्रमाण कमी करण्यासाठी अशा विशेष मोहिमा सातत्याने राबविण्यात येणार असल्याचे शहर वाहतूक शाखेकडून सांगण्यात आले.
