भुसावळ (प्रतिनिधी) : भुसावळ शहरातील बाजारपेठ पोलीस ठाण्यात कार्यरत असलेल्या एका पोलीस उपनिरीक्षकासह त्याच्या खासगी पंटरला लाचखोरी प्रकरणात जळगाव लाचलुचपत प्रतिबंधक विभागाने (ACB) रंगेहाथ अटक केली आहे. या कारवाईमुळे भुसावळसह संपूर्ण जळगाव जिल्हा पोलीस दलात मोठी खळबळ उडाली आहे.
अटक करण्यात आलेल्या पोलीस उपनिरीक्षकाचे नाव राजू सांगळे असे असून, खासगी पंटरचे नाव सलीम हकीम कुरेशी असे आहे. मिळालेल्या माहितीनुसार, संबंधित तक्रारदाराविरोधातील गुन्ह्यात अटक न करता केवळ प्रतिबंधक कारवाई (चॅप्टर केस) करून सोडून देण्यासाठी पोलीस उपनिरीक्षक राजू सांगळे यांनी ३० हजार रुपयांच्या लाचेची मागणी केली होती.
तक्रारदाराला लाच द्यायची नसल्याने त्याने थेट जळगाव एसीबी कार्यालयात तक्रार दाखल केली. तक्रारीची पडताळणी केल्यानंतर एसीबीच्या पथकाने शुक्रवार (२९ मे) सायंकाळी सुमारे ४ वाजेच्या सुमारास भुसावळ बाजारपेठ पोलीस ठाण्याच्या हद्दीत सापळा रचला.
दरम्यान, पोलीस उपनिरीक्षक सांगळे यांनी त्यांचा खासगी पंटर सलीम कुरेशी याच्या माध्यमातून तक्रारदाराशी संपर्क साधत तडजोड केली आणि लाचेची रक्कम २० हजार रुपयांवर निश्चित करण्यात आली. ठरल्याप्रमाणे सलीम कुरेशी याने तक्रारदाराकडे २० हजार रुपयांची मागणी केली. त्याचवेळी दबा धरून बसलेल्या एसीबीच्या पथकाने सलीम कुरेशी याला रंगेहाथ ताब्यात घेतले.
चौकशीदरम्यान सलीम कुरेशी याने ही रक्कम पोलीस उपनिरीक्षक राजू सांगळे यांच्या सांगण्यावरून मागितल्याची कबुली दिली. त्यानंतर एसीबीने तात्काळ कारवाई करत राजू सांगळे यांनाही अटक केली.
या प्रकरणी भुसावळ बाजारपेठ पोलीस ठाण्यात गुन्हा दाखल करण्याची प्रक्रिया सुरू असून, एसीबीच्या या धडक कारवाईमुळे भ्रष्ट अधिकाऱ्यांमध्ये खळबळ उडाली आहे.
