जळगाव(प्रतिनिधी): शहर वाहतूक शाखेतर्फे शनिवार (18 जुलै 2026) रोजी राबविण्यात आलेल्या ‘झीरो फेटालिटी’ विशेष मोहिमेत वाहतूक नियमांचे उल्लंघन करणाऱ्या 143 वाहनचालकांवर कारवाई करण्यात आली. या कारवाईत ₹1 लाख 20 हजार 700 रुपयांचे ई-चलन करण्यात आले असून, ₹1,200 रुपयांचा रोख दंड जागीच वसूल करण्यात आला.
या मोहिमेदरम्यान रहदारीस अडथळा निर्माण करणाऱ्या 50 वाहनांवर, विना परवाना वाहन चालविणाऱ्या 39 जणांवर, विना हेल्मेट वाहन चालविणाऱ्या 2 जणांवर, 4 नाबालिग चालकांवर, ट्रिपल सीट प्रवास करणाऱ्या 10 वाहनचालकांवर, मद्यप्राशन करून वाहन चालविणाऱ्या 2 चालकांवर, विना सीटबेल्ट वाहन चालविणाऱ्या 13 चालकांवर तसेच इतर 23 प्रकरणांमध्ये कारवाई करण्यात आली.
रहदारीस अडथळा निर्माण करणारी वाहने आणि ट्रिपल सीट प्रवासाविरोधात दाणा बाजार परिसरात सायंकाळी 5 ते 6 या वेळेत विशेष मोहीम राबविण्यात आली. ही कारवाई उपविभागीय पोलीस अधिकारी (शहर विभाग) यांच्या मार्गदर्शनाखाली आरसीपी प्लाटून आणि शहर वाहतूक शाखेच्या अंमलदारांनी संयुक्तपणे केली.
वाहतूक नियमांचे काटेकोर पालन करून अपघातमुक्त शहर घडविण्याच्या उद्देशाने अशा विशेष मोहिमा पुढेही सुरू राहणार असल्याची माहिती पोलीस निरीक्षक मोरेश्वर पेंदाम यांनी दिली.
