जळगाव (प्रतिनिधी):नवीन बस स्थानक परिसरात प्रवाशांच्या गर्दीत एका वृद्ध महिलेच्या गळ्यातील सोन्याचे मंगळसूत्र चोरीला गेल्याची घटना समोर आली आहे. या प्रकरणी जिल्हापेठ पोलीस ठाणे येथे अज्ञात चोरट्याविरोधात गुन्हा दाखल करण्यात आला आहे.
मिळालेल्या माहितीनुसार, वडी येथील रमण कौतीक पाटील (वय ७०) हे आपल्या पत्नी यमुनाबाई पाटील यांच्यासह २२ मे रोजी जळगाव शहरात आले होते. दुपारी सुमारे २.१० वाजण्याच्या सुमारास ते नवीन बसस्थानक परिसरात असताना मोठ्या गर्दीचा फायदा घेत अज्ञात चोरट्याने यमुनाबाई यांच्या गळ्यातील सोन्याची पोत आणि मंगळसूत्राचे पदक चोरून नेले.
चोरीला गेलेल्या दागिन्यांचे वजन सुमारे ९ ग्रॅम असून त्याची किंमत अंदाजे ३० हजार रुपये असल्याचे सांगण्यात आले आहे. हा प्रकार लक्षात येताच वृद्ध दाम्पत्याने तातडीने जिल्हापेठ पोलीस ठाण्यात धाव घेत तक्रार दाखल केली.
रमण पाटील यांच्या फिर्यादीवरून भारतीय न्याय संहिता (BNS) २०२३ अंतर्गत कलम ३०३(२) नुसार अज्ञात व्यक्तीविरोधात चोरीचा गुन्हा नोंदवण्यात आला आहे. प्रकरणाचा तपास सहाय्यक पोलीस निरीक्षक अनिल वाघ यांच्या मार्गदर्शनाखाली पोलीस हवालदार शरीफ शेख करत आहेत.
- दरम्यान, बसस्थानक परिसरात वाढत्या गर्दीमुळे अशा प्रकारच्या चोरीच्या घटनांमध्ये वाढ होत असल्याने प्रवाशांनी सतर्क राहण्याचे आवाहन पोलिसांकडून करण्यात येत आहे.
