पहुर (प्रतिनिधी): जळगाव जिल्ह्यातील मोटारसायकल चोरीचे गुन्हे उघडकीस आणण्याच्या अनुषंगाने पहुर पोलिसांनी कारवाई करत एका संशयित आरोपीस अटक केली आहे. आरोपीकडून चोरीच्या दोन मोटारसायकली असा एकूण ४० हजार रुपयांचा मुद्देमाल हस्तगत करण्यात आला आहे.
पहुर पोलीस स्टेशन येथे गु.र.नं. १८७/२०२६, भारतीय न्याय संहिता कलम ३०३(२) अन्वये मोटारसायकल चोरीचा गुन्हा दाखल करण्यात आला होता. या गुन्ह्याचा तपास सुरू असताना पोलिसांना गोपनीय बातमीदारामार्फत संशयित आरोपी आकाश सुभाष गुजर (वय २८, रा. नांदनखेडा, ता. जामनेर) याच्याबाबत माहिती मिळाली. त्यानुसार पोलिसांनी त्यास ताब्यात घेतले.
सुरुवातीला आरोपीने उडवाउडवीची उत्तरे दिली. मात्र, पोलिसांनी विश्वासात घेऊन कसून चौकशी केली असता त्याने दोन मोटारसायकली चोरी केल्याची कबुली दिल्याचे पोलिसांनी सांगितले. त्याच्या ताब्यातून पुढील दुचाकी हस्तगत करण्यात आल्या—
– हिरो फॅशन प्रो मोटारसायकल क्र. MH-19-BV-8899 — किंमत १५ हजार रुपये.
– हिरो स्प्लेंडर मोटारसायकल क्र. MH-19-DK-4013 — किंमत २५ हजार रुपये.
अशा प्रकारे पोलिसांनी एकूण ४० हजार रुपयांचा मुद्देमाल हस्तगत केला आहे.
ही कारवाई जिल्हा पोलीस अधीक्षक श्रीकांत धिवरे, अपर पोलीस अधीक्षक चाळीसगाव श्री. अशोक नखाते आणि उपविभागीय पोलीस अधिकारी पाचोरा विभाग श्री. बापू रोहोम यांच्या मार्गदर्शनाखाली करण्यात आली.
कारवाईत सहा. पोलीस निरीक्षक श्री. प्रविण दातरे, पोलीस उपनिरीक्षक गणेश सुस्ते, पोहेकॉ. सचिन चौधरी, पोहेकॉ. राहुल पाटील, पोना. दीपक पाटील, पोकॉ. ईश्वर कोकणे, पोकॉ. सत्यवान कोळी, पोहेकॉ. विकास गायकवाड तसेच चालक पोहेकॉ. हेमंत सोनवणे यांनी सहभाग घेतला.
सदर गुन्ह्याचा पुढील तपास पोना. दीपक पाटील करीत आहेत.
