जळगाव (प्रतिनिधी):
जळगाव शहरातील शिवाजीनगर परिसरात घरफोडीची घटना उघडकीस आली असून चोरट्यांनी घरातून सुमारे ६३ हजार रुपयांचा ऐवज लंपास केला. या प्रकरणी जळगाव शहर पोलीस ठाण्यात गुन्हा दाखल करण्यात आला असून पोलिसांनी दोन संशयितांना ताब्यात घेतले आहे.
पोलिसांनी दिलेल्या माहितीनुसार, शिवाजीनगर येथील भगतसिंग चौक परिसरातील घर क्रमांक १९६ मध्ये राहणारे सुशील भाऊलाल भावसार (वय ६१) यांच्या घरी २५ जून रोजी रात्री १० ते २६ जून रोजी सकाळी ७ वाजेदरम्यान अज्ञात चोरट्यांनी घरफोडी केली.
चोरट्यांनी घरातील ४२ हजार रुपये किमतीचा डेल कंपनीचा लॅपटॉप, १५ हजार रुपये किमतीचा नोकिया अँड्रॉइड मोबाईल, १ हजार रुपये किमतीचा सॅमसंग मोबाईल, दोन किलो वजनाची पितळी कढई (२ हजार रुपये) तसेच ३ हजार रुपये रोख रक्कम असा एकूण ६३ हजार रुपयांचा मुद्देमाल चोरून नेला.
या प्रकरणी जळगाव शहर पोलीस ठाण्यात भारतीय न्याय संहिता (बीएनएस) कलम ३३१(४) व ३०५(अ) अन्वये गुन्हा दाखल करण्यात आला आहे.
दरम्यान, पोलिसांनी राफत शेख फिरोज आणि शारिम शेख मुसेफ उर्फ मुसाब या दोन संशयितांना ताब्यात घेतले असून, पोलीस निरीक्षकांच्या मार्गदर्शनाखाली पोहेकॉ. योगेश पाटील पुढील तपास करीत आहेत.
