जळगाव, दि. २२ (प्रतिनिधी) : महाराष्ट्र विधान परिषदेच्या जळगाव स्थानिक प्राधिकरण मतदारसंघाच्या निवडणुकीत महायुती व भारतीय जनता पक्षाचे उमेदवार नंदकिशोर भागवत महाजन यांनी एकतर्फी विजय मिळवत विरोधकांना मोठा धक्का दिला. महाजन यांना तब्बल ५८२ मते मिळाल्याने त्यांचा विजय दणदणीत ठरला.
या निवडणुकीत एकूण ६१६ पैकी ६११ वैध मते नोंदविण्यात आली. त्यापैकी महाजन यांनी ५८२ मतांसह स्पष्ट वर्चस्व राखले. इतर उमेदवारांमध्ये शरद शामराव तायडे यांना १७ मते, अनिल छबिलदास चौधरी यांना ११ मते, तर रेश्मा कुंदन काळे यांना केवळ १ मत मिळाले. तसेच ५ मते अवैध ठरली.
मतमोजणीच्या तिन्ही टेबलांवर महाजन यांना आघाडी मिळाली. टेबल क्रमांक १ वर २०७, टेबल क्रमांक २ वर १९१ आणि टेबल क्रमांक ३ वर १८४ मते मिळवत त्यांनी एकूण ५८२ मतांचा टप्पा गाठला.
मतमोजणी पूर्ण झाल्यानंतर भारत निवडणूक आयोगाच्या मान्यतेने जिल्हा निवडणूक निर्णय अधिकारी तथा जिल्हाधिकारी रोहन घुगे यांच्या हस्ते नंदकिशोर महाजन यांना विजयी प्रमाणपत्र प्रदान करण्यात आले.
यावेळी खासदार स्मिता वाघ, आमदार सुरेश भोळे, मंगेश चव्हाण, अमोल जावळे तसेच भाजप व महायुतीचे पदाधिकारी, कार्यकर्ते आणि प्रशासनातील अधिकारी मोठ्या संख्येने उपस्थित होते.
स्थानिक स्वराज्य संस्थांमधील महायुतीच्या बळकटीचे हे द्योतक मानले जात असून, महाजन यांच्या विजयामुळे जळगाव जिल्ह्यात भाजपच्या संघटनात्मक ताकदीवर पुन्हा एकदा शिक्कामोर्तब झाले आहे.
