जळगाव (प्रतिनिधी): शहरातील निमखेडी रोड परिसरात असलेल्या एका अपार्टमेंटमध्ये सुरू असलेल्या अवैध सेक्स रॅकेटचा तालुका पोलिसांनी पर्दाफाश केला आहे. पोलिसांच्या या कारवाईमुळे परिसरात मोठी खळबळ उडाली असून नागरिकांमध्ये चर्चेला उधाण आले आहे.
माहितीनुसार, संबंधित अपार्टमेंटमध्ये गेल्या काही दिवसांपासून गुप्तपणे वेश्या व्यवसाय सुरू असल्याची माहिती तालुका पोलिसांना मिळाली होती. त्यानंतर पोलिसांनी बनावट ग्राहकाच्या माध्यमातून खात्री करून नियोजनबद्ध सापळा रचला. त्यानंतर अचानक छापा टाकत कारवाई करण्यात आली.
या धाडीत काही महिला तसेच संशयित व्यक्तींना पोलिसांनी ताब्यात घेतले असून घटनास्थळावरून मोबाईल, रोख रक्कम आणि आक्षेपार्ह साहित्य जप्त करण्यात आल्याची प्राथमिक माहिती समोर आली आहे. संबंधितांविरुद्ध अनैतिक मानवी वाहतूक प्रतिबंधक कायद्यान्वये गुन्हा दाखल करण्याची प्रक्रिया सुरू होती.
ही कारवाई जळगाव तालुका पोलीस स्टेशनच्या पथकाने वरिष्ठ अधिकाऱ्यांच्या मार्गदर्शनाखाली केली. शहर व ग्रामीण भागात सुरू असलेल्या अवैध धंद्यांवर यापुढेही कठोर कारवाई केली जाणार असल्याचा इशारा पोलिस प्रशासनाने दिला आहे.
