जळगाव (प्रतिनिधी): शहरात झालेल्या पार्टीदरम्यान किरकोळ वादातून झालेल्या गोळीबारात आकाश उर्फ टपऱ्या युवराज बाविस्कर (वय २८, रा. कांचननगर) याचा मृत्यू झाला आहे. या प्रकरणी शनिपेठ पोलिस ठाण्यात सहा जणांविरुद्ध खुनाचा गुन्हा दाखल करण्यात आला असून, आरोपी विक्की चौधरी याला अटक करण्यात आली आहे. तर गोळी झाडणारा मुख्य संशयित आकाश उर्फ डोया मुरलीधर सपकाळे अद्याप फरार आहे.
वादातून गोळीबार
ही घटना ९ नोव्हेंबर रोजी रात्री घडली. आकाश बाविस्कर, आकाश सपकाळे, गणेश सोनवणे आणि सागर पाटील पार्टीसाठी एकत्र आले होते. पार्टीदरम्यान वाद झाल्यानंतर प्रशांत चौकात परिस्थिती बिघडली आणि गोळीबार झाला.
संशयित आकाश सपकाळे याने प्रथम गणेश सोनवणे याच्यावर गोळी झाडली. दुसरी गोळी झाडताना ती चुकून आकाश बाविस्करच्या छातीत घुसली. उपचारादरम्यान त्याचा मृत्यू झाला.
कुंटणखान्याच्या टीपवरून वाद
मुख्य आरोपी आकाश सपकाळे हा मन्यारखेडा शिवारातील कुंटणखान्यात भागीदार होता. नुकतीच नशिराबाद पोलिसांनी त्या ठिकाणी छापा टाकला होता. या कारवाईची माहिती सागर पाटील आणि गणेश सोनवणे यांनी पोलिसांना दिल्याचा संशय सपकाळेला होता. याच संशयातून दोघांमध्ये वाद निर्माण झाल्याचे पोलिस तपासातून समोर आले आहे.
हद्दपार असूनही शहरात गुन्हा
गोळीबारातील आरोपी आकाश सपकाळे आणि जखमी गणेश सोनवणे हे दोघेही पूर्वी हद्दपार आहेत. तरीदेखील त्यांनी शहरात प्रवेश करून गंभीर गुन्हा केला.
पोलिसांनी घटनेनंतर विक्की चौधरी, सागर पाटील आणि तुषार सोनवणे यांना ताब्यात घेतले. चौकशीनंतर विक्की चौधरीला अटक करण्यात आली, तर सागर पाटील आणि तुषार सोनवणे यांना सोडण्यात आले, अशी माहिती पोलिस निरीक्षक कावेरी कमलाकर यांनी दिली.
सहा जणांविरुद्ध गुन्हा दाखल
मृत आकाश बाविस्करचे वडील युवराज बाविस्कर यांच्या फिर्यादीवरून खालील सहा संशयितांविरुद्ध खुनाचा गुन्हा दाखल करण्यात आला आहे –
1. आकाश (उर्फ डोया) मुरलीधर सपकाळे (फरार)
2. गणेश उर्फ काल्या रवींद्र सोनवणे
3. सागर सुधाकर पाटील
4. तुषार उर्फ साबू रामसिंग सोनवणे
5. विक्की अरुण चौधरी (अटक)
6. करण पाटील (रा. कुसुंबा, ता. जळगाव)
मुख्य आरोपी आकाश सपकाळे याचा शोध सुरू असून, या प्रकरणाचा तपास शनिपेठ पोलिसांकडून सुरू आहे.
