जळगाव (प्रतिनिधी) : शहरातील तांबापुरा मच्छी मार्केट परिसरात एका १८ वर्षीय तरुणीवर धमकावून अत्याचार करण्यात आल्याची गंभीर घटना उघडकीस आली आहे. याप्रकरणी एमआयडीसी पोलीस ठाण्यात संशयित आरोपीविरुद्ध गुन्हा दाखल करण्यात आला असून पोलिसांकडून पुढील तपास सुरू आहे.
पोलिसांकडून मिळालेल्या माहितीनुसार, शाकीब अस्लम पटेल (वय २०, रा. तांबापुरा, मच्छी मार्केट, जळगाव) याने पीडित तरुणीच्या भावाला ठार मारण्याची धमकी देत तिच्यावर दबाव टाकला. १ नोव्हेंबर २०२५ ते २० मे २०२६ या कालावधीत आरोपीने तरुणीला तिच्या राहत्या घरी वारंवार बोलावून तिच्या इच्छेविरुद्ध शारीरिक संबंध ठेवले, अशी तक्रार पीडितेने दिली आहे.
या प्रकारामुळे संबंधित तरुणी गर्भवती राहिली. त्यानंतर आरोपीने गर्भपाताच्या गोळ्या आणून त्या घेण्यासाठी दबाव टाकल्याचाही आरोप तक्रारीत करण्यात आला आहे.
घटनेची माहिती मिळताच उपविभागीय पोलीस अधिकारी नितीन गणपुरे यांनी घटनास्थळी भेट देऊन पाहणी केली. पोलीस निरीक्षक बबन आव्हाड व ग्रेड पोलीस उपनिरीक्षक राजेंद्र उगले यांच्या मार्गदर्शनाखाली तपास सुरू असून सहाय्यक पोलीस निरीक्षक माधुरी बोरसे पुढील तपास करत आहेत.
या प्रकरणी भारतीय न्याय संहिता २०२३ अंतर्गत कलम ६४(२)(m), ८९ व ३५१(२) नुसार गुन्हा दाखल करण्यात आला आहे. अद्याप संशयित आरोपीला अटक करण्यात आलेली नसल्याची माहिती पोलिसांनी दिली.
