जळगाव : (प्रतिनिधी: इम्रान खान):
जळगाव शहरातील वाहतूक व्यवस्था अधिक शिस्तबद्ध करण्यासाठी जळगाव पोलिसांनी वाहतूक नियमभंग करणाऱ्यांविरोधात मोहीम तीव्र केली आहे. या मोहिमेदरम्यान पोलीस अधीक्षक श्रीकांत धिवरे यांनी स्वतः रस्त्यावर उतरून इच्छादेवी चौकात वाहतूक नियमांचे उल्लंघन करणाऱ्या वाहनचालकांवर कारवाई केली.
हेल्मेटचा वापर न करणे, ट्रिपल सीट प्रवास, सिग्नलचे उल्लंघन तसेच चुकीच्या पद्धतीने वाहन पार्क करणे अशा नियमभंगांच्या प्रकारांवर पोलिसांनी कारवाई केली. यावेळी पोलीस अधीक्षक धिवरे यांनी वाहनचालकांशी संवाद साधत वाहतूक नियमांचे काटेकोरपणे पालन करण्याचे आवाहन केले.
वाहतूक नियम हे नागरिकांच्या सुरक्षिततेसाठी असून अपघात टाळण्यासाठी दुचाकीस्वारांनी हेल्मेट, तर चारचाकी वाहनचालकांनी सीटबेल्टचा वापर करणे आवश्यक असल्याचे त्यांनी स्पष्ट केले.
या मोहिमेचा उद्देश केवळ दंडात्मक कारवाई करणे नसून नागरिकांमध्ये वाहतूक नियमांबाबत जनजागृती निर्माण करणे हा देखील आहे. वरिष्ठ पोलीस अधिकारी स्वतः रस्त्यावर उतरल्याने वाहतूक नियमांची अंमलबजावणी अधिक प्रभावीपणे होत असल्याचे चित्र इच्छादेवी चौकात पाहायला मिळाले.
जळगाव शहरातील नागरिकांनी वाहतूक नियमांचे पालन करून पोलिसांना सहकार्य करावे, हेल्मेटचा वापर करावा आणि निर्धारित वेगमर्यादेतच वाहन चालवावे, असे आवाहन पोलिसांकडून करण्यात आले आहे.
