नागपूर(प्रतिनिधी ):दि. 5 ऑगस्ट : नागपूर गुन्हे शाखेच्या अमली पदार्थ विरोधी पथकाने कोतवाली पोलीस ठाण्याच्या हद्दीतील चितार ओळी, नागोबा गल्ली क्रमांक 2 येथे धाड टाकून 1 किलो 145 ग्रॅम गांजासह एका युवकाला ताब्यात घेतले. या कारवाईत गांजा व मोबाईलसह एकूण 43 हजार 625 रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, शेख जुबेर शेख आबीद (वय 25, रा. चितार ओळी, महाल) याला ताब्यात घेण्यात आले. त्याच्याविरुद्ध यापूर्वीही शांतीनगर पोलीस ठाण्यात विविध कलमांन्वये गुन्हे दाखल असल्याची माहिती समोर आली आहे.
या प्रकरणातील दुसरा आरोपी शेख इम्तियाज शेख जब्बार (वय 65) हा फरार असून त्याचा शोध पोलीस घेत आहेत. त्याच्याविरुद्ध विविध पोलीस ठाण्यांमध्ये एनडीपीएस कायद्यांतर्गत सहा गुन्हे तसेच तहसील पोलीस ठाण्यात खुनाच्या प्रयत्नाचा गुन्हा दाखल असल्याचे पोलिसांनी सांगितले.
अमली पदार्थ विरोधी पथकाला मिळालेल्या गुप्त माहितीच्या आधारे 4 ऑगस्टच्या रात्री ही कारवाई करण्यात आली. आरोपीच्या ताब्यातून 1 किलो 145 ग्रॅम गांजा जप्त करण्यात आला असून त्याच्याविरुद्ध एनडीपीएस कायद्याच्या कलम 8(क), 20(ब)(2)(ब) आणि 29 अन्वये गुन्हा दाखल करण्यात आला आहे.
या प्रकरणाचा पुढील तपास कोतवाली पोलीस करीत आहेत. ही कारवाई पोलीस निरीक्षक भारत क्षीरसागर यांच्या मार्गदर्शनाखाली अमली पदार्थ विरोधी पथकाने यशस्वीरीत्या पार पाडली.
