जळगाव(प्रतिनिधी: इमरान खान):दि. १७ जुलै : जळगाव शहरातील कालिका माता मंदिर परिसरातील HDFC बँकेजवळ घडलेल्या १ लाख रुपयांच्या चोरीच्या गुन्ह्याचा शनिपेठ पोलिसांनी काही तासांत यशस्वी उलगडा केला आहे. या प्रकरणी एका आरोपीला अटक करण्यात आली असून त्याच्याकडून चोरीची संपूर्ण १ लाख रुपयांची रोख रक्कम तसेच गुन्ह्यात वापरलेली इलेक्ट्रिक स्कूटर जप्त करण्यात आली आहे.
पोलिसांनी दिलेल्या माहितीनुसार, १३ जुलै २०२६ रोजी दुपारी ३.३० ते ४.१० वाजण्याच्या सुमारास फिर्यादी अबरार अली इरफान अली चौधरी (वय २६, रा. लक्ष्मीनगर, मेहरूण, जळगाव) हे कालिका माता मंदिर चौकातील HDFC बँकेजवळ आले होते. त्यांनी त्यांची मोटारसायकल पार्क करून पाणीपुरी खात असताना वाहनाच्या डिक्कीत ठेवलेली १ लाख रुपयांची रोख रक्कम अज्ञात चोरट्याने लंपास केली.
याप्रकरणी १६ जुलै रोजी शनिपेठ पोलीस ठाण्यात गुन्हा क्रमांक १५१/२०२६ भारतीय न्याय संहिता, २०२३ च्या कलम ३०३(२) अन्वये गुन्हा दाखल करण्यात आला.
गुन्ह्याचे गांभीर्य लक्षात घेऊन पोलीस अधीक्षक श्रीकांत धिवरे यांच्या मार्गदर्शनाखाली पोलीस निरीक्षक विशाल जयस्वाल यांनी तपासाची सूत्रे हाती घेतली. गुन्हे शोध पथकाने घटनास्थळ व परिसरातील सीसीटीव्ही फुटेज संकलित करून त्याचे तांत्रिक विश्लेषण केले. तसेच गुप्त बातमीदारांच्या मदतीने संशयिताचा शोध सुरू करण्यात आला.
तांत्रिक पुरावे आणि गुप्त माहितीच्या आधारे रवि जगदीश प्रजापत (वय ३६, रा. प्रजापत नगर, मामुराबाद रोड, जळगाव) याला असोदा रोडवरील निसर्ग कॉलनी परिसरातून ताब्यात घेण्यात आले. चौकशीदरम्यान त्याने चोरीची कबुली दिली.
पोलिसांनी आरोपीकडून चोरीची संपूर्ण १ लाख रुपयांची रोख रक्कम आणि गुन्ह्यात वापरलेली इलेक्ट्रिक स्कूटर जप्त केली असून पुढील तपास सुरू आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि उपविभागीय पोलीस अधिकारी नितीन गणपुरे यांच्या मार्गदर्शनाखाली पोलीस निरीक्षक विशाल जयस्वाल यांच्या नेतृत्वात पोलीस उपनिरीक्षक संतोष खेडकर, अभिषेक कटारे तसेच गुन्हे शोध पथकातील अधिकारी व कर्मचाऱ्यांनी केली. सीसीटीव्ही फुटेजचे तांत्रिक विश्लेषण पोहेका मुबारक देशमुख यांनी प्रभावीपणे केले.
दरम्यान, नागरिकांनी मोठ्या प्रमाणावर रोख रक्कम किंवा मौल्यवान वस्तू वाहनाच्या डिक्कीत अथवा वाहनात निष्काळजीपणे ठेवू नयेत. संशयास्पद हालचाली किंवा व्यक्ती आढळल्यास तात्काळ जवळच्या पोलीस ठाण्याशी किंवा डायल ११२ वर संपर्क साधावा, असे आवाहन पोलीस अधीक्षक श्रीकांत धिवरे यांनी केले आहे.
