जळगाव(प्रतिनिधी: इमरान खान):
जळगाव शहरातील सुप्रीम कॉलनी परिसरातील देशी दारू दुकानात घरफोडी करून रोख रक्कम चोरणाऱ्या अट्टल चोरट्याला एमआयडीसी पोलिसांनी अवघ्या एका दिवसात अटक करत चोरीतील ८ हजार रुपये रोख मुद्देमाल हस्तगत केला आहे.
पोलिसांनी दिलेल्या माहितीनुसार, सुप्रीम कॉलनी येथील देशी दारू दुकानात १३ जुलैच्या रात्री ते १४ जुलैच्या सकाळी ७.३० वाजेच्या दरम्यान अज्ञात चोरट्याने दुकानाच्या खिडकीचे गज तोडून आत प्रवेश केला. त्यानंतर काउंटरमधील ड्रॉवर उघडून त्यात ठेवलेली ८ हजार रुपयांची रोख रक्कम चोरून नेली. याप्रकरणी दुकान व्यवस्थापक यांच्या फिर्यादीवरून एमआयडीसी पोलीस ठाण्यात भारतीय न्याय संहिता कलम ३०५(अ) व ३३१(३)(४) अन्वये गुन्हा दाखल करण्यात आला.
गुन्ह्याचे गांभीर्य लक्षात घेऊन पोलीस निरीक्षक बबन आव्हाड यांनी पोलीस उपनिरीक्षक चंद्रकांत धनके यांच्या नेतृत्वाखाली विशेष पथकाची नियुक्ती केली. पथकाने घटनास्थळाची पाहणी, तांत्रिक विश्लेषण आणि गोपनीय माहितीच्या आधारे संशयिताची ओळख पटवली.
त्यानुसार १४ जुलै रोजी सुप्रीम कॉलनी परिसरात सापळा रचून उमेश उर्फ भावड्या संतोष पाटील (वय २६, रा. सुप्रीम कॉलनी, जळगाव) याला ताब्यात घेण्यात आले. चौकशीत त्याने घरफोडीची कबुली दिल्यानंतर त्याला अटक करण्यात आली. त्याच्याकडून चोरीतील ८ हजार रुपये रोख जप्त करण्यात आले.
आरोपीला न्यायालयात हजर केले असता न्यायालयाने एक दिवसांची पोलीस कोठडी सुनावली असून पुढील तपास पोलीस हेड कॉन्स्टेबल किरण चौधरी करीत आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे यांच्या मार्गदर्शनाखाली पोलीस निरीक्षक बबन आव्हाड, पोलीस उपनिरीक्षक चंद्रकांत धनके तसेच एमआयडीसी पोलीस ठाण्याच्या पथकाने यशस्वीरीत्या पार पाडली.
