भुसावळ(प्रतिनिधी: इमरान खान): शहरात पुन्हा एकदा गोळीबाराची घटना घडल्याने खळबळ उडाली आहे. सोमवारी रात्री सुमारे १०.३० वाजण्याच्या सुमारास दगडी पुला परिसरातील हनुमान मंदिराजवळ ही घटना घडली.
प्राथमिक माहितीनुसार, गोलू रायसिंग पंडित हे त्यांच्या घरासमोरील ओट्यावर बसलेले असताना दुचाकीवरून आलेल्या दोन अज्ञात व्यक्तींनी कथितरित्या गावठी कट्ट्यातून त्यांच्यावर गोळीबार केला. हल्ल्यानंतर आरोपी घटनास्थळावरून पसार झाले.
घटनेची माहिती मिळताच बाजारपेठ पोलीस ठाण्याचे अधिकारी तसेच स्थानिक गुन्हे शाखेचे पथक तातडीने घटनास्थळी दाखल झाले. पोलिसांनी परिसराची पाहणी करून पुरावे संकलित करण्यास सुरुवात केली असून, सीसीटीव्ही फुटेज आणि इतर तांत्रिक बाबींच्या आधारे तपास सुरू आहे.
दरम्यान, या गोळीबारामागील नेमके कारण अद्याप स्पष्ट झालेले नाही. किती गोळ्या झाडण्यात आल्या, या घटनेत कोणी जखमी झाले का, तसेच हल्लेखोरांची ओळख काय आहे, याबाबत अधिकृत माहिती अद्याप समोर आलेली नाही.
घटनेनंतर परिसरात काही काळ तणावाचे वातावरण निर्माण झाले असून, पोलिसांकडून सर्व बाजूंनी तपास सुरू आहे. अधिकृत माहिती मिळाल्यानंतरच घटनेचे नेमके स्वरूप स्पष्ट होणार आहे.
