धरणगाव (प्रतिनिधी): धरणगाव शहरातील घरफोडीच्या गुन्ह्याचा स्थानिक गुन्हे शाखेने अवघ्या काही दिवसांत छडा लावत दोन आरोपींना अटक केली असून एका विधिसंघर्षग्रस्त बालकाला ताब्यात घेतले आहे. आरोपींकडून ७५ हजार रुपयांचा चोरीचा मुद्देमाल जप्त करण्यात आला आहे.
पोलीसांनी दिलेल्या माहितीनुसार, फिर्यादी हे कुटुंबासह २३ मार्च २०२६ रोजी देवदर्शनासाठी बाहेरगावी गेले होते. या संधीचा फायदा घेत अज्ञात चोरट्यांनी त्यांच्या घराचे कुलूप तोडून घरात प्रवेश केला आणि सोने-चांदीचे दागिने तसेच रोख रक्कम असा एकूण १ लाख ९८ हजार रुपयांचा ऐवज चोरी करून नेला. याप्रकरणी ३१ मार्च २०२६ रोजी धरणगाव पोलीस ठाण्यात गुन्हा क्रमांक ८३/२०२६ भारतीय न्याय संहिता, २०२३ च्या कलम ३०५(अ) व ३३१(४) अन्वये गुन्हा दाखल करण्यात आला होता.
प्रकरणाचे गांभीर्य लक्षात घेऊन पोलीस अधीक्षक श्रीकांत धिवरे यांच्या मार्गदर्शनाखाली स्थानिक गुन्हे शाखेचे प्रभारी पोलीस निरीक्षक राहुल गायकवाड यांनी विशेष पथकाची स्थापना करून तपास सुरू केला. पथकाने घटनास्थळाची पाहणी, सीसीटीव्ही फुटेजचे विश्लेषण तसेच गोपनीय माहितीच्या आधारे तांत्रिक तपास करत आरोपींचा माग काढला.
तपासादरम्यान संदीप थोरात (वय २६, रा. एकता नगर, संजयनगर, धरणगाव) आणि कार्तिक उर्फ आबा महाजन (वय २०, रा. एकता नगर, संजयनगर, धरणगाव) यांना अटक करण्यात आली. तसेच एका विधिसंघर्षग्रस्त बालकाला ताब्यात घेण्यात आले. चौकशीदरम्यान तिघांनीही घरफोडीची कबुली दिली. त्यानंतर बालकाला बालन्याय मंडळासमोर हजर करण्यात आले.
आरोपींकडून ६२ हजार रुपये रोख, ८९ ग्रॅम वजनाची सुमारे ३ हजार रुपये किमतीची चांदीची लगड तसेच ३.१२० ग्रॅम वजनाची सुमारे १० हजार रुपये किमतीची सोन्याची लगड असा एकूण ७५ हजार रुपयांचा मुद्देमाल हस्तगत करण्यात आला आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक अशोक नखाते आणि उपविभागीय पोलीस अधिकारी सुनील पाटील यांच्या मार्गदर्शनाखाली स्थानिक गुन्हे शाखेचे पोलीस निरीक्षक राहुल गायकवाड यांच्या नेतृत्वात पोलीस उपनिरीक्षक संतोष पवार तसेच विष्णू बिन्हाडे, दीपक माळी, रविंद्र पाटील, ईश्वर पाटील, रावसाहेब पाटील आणि महेश सोमवंशी यांच्या पथकाने यशस्वीरीत्या पार पाडली.
