जळगाव (प्रतिनिधी: इमरान खान) : जळगाव एमआयडीसी पोलिसांनी धडक कारवाई करत गावठी कट्टा बाळगून फिरणाऱ्या एका तरुणाला अटक केली. आरोपीकडून सुमारे २० हजार रुपये किमतीचा गावठी कट्टा (मॅगझीनसह) जप्त करण्यात आला आहे.
पोलीस उपनिरीक्षक चंद्रकांत धनके यांना गोपनीय बातमीदारामार्फत माहिती मिळाली होती की, जळगाव विमानतळासमोरील कुरुंबा परिसरातून धनवड गावाकडे जाणाऱ्या कच्च्या रस्त्यावर एक इसम गावठी कट्टा घेऊन फिरत आहे. या माहितीची खातरजमा केल्यानंतर पोलीस निरीक्षक बबन आव्हाड यांच्या मार्गदर्शनाखाली विशेष पथकाने घटनास्थळी सापळा रचला.
यावेळी संशयित इसम पोलिसांना पाहताच पळून जाण्याचा प्रयत्न करू लागला. मात्र, पोलिसांनी पाठलाग करून त्याला ताब्यात घेतले. चौकशीदरम्यान त्याने उडवाउडवीची उत्तरे दिल्याने त्याची कायदेशीर अंगझडती घेण्यात आली. त्यावेळी त्याच्या कमरेला खोचलेला लोखंडी काळ्या रंगाचा गावठी कट्टा (मॅगझीनसह) आढळून आला.
अटक करण्यात आलेल्या आरोपीचे नाव गणेश श्रावण सोनवणे (वय २४, रा. कुरुंबा, ता. जि. जळगाव) असे आहे. त्याच्याकडून २० हजार रुपये किमतीचा गावठी कट्टा जप्त करण्यात आला.
या प्रकरणी एमआयडीसी पोलीस ठाण्यात गुन्हा रजिस्टर क्रमांक ५७९/२०२६ अन्वये भारतीय शस्त्र अधिनियम कलम ३/२५ तसेच महाराष्ट्र पोलीस अधिनियम कलम ३७ (१), ३७ (३) व १३५ नुसार गुन्हा दाखल करण्यात आला आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि उपविभागीय पोलीस अधिकारी नितीन गणपुरे यांच्या मार्गदर्शनाखाली पोलीस निरीक्षक बबन आव्हाड यांच्या नेतृत्वाखाली पोलीस उपनिरीक्षक चंद्रकांत धनके व त्यांच्या विशेष पथकाने केली. पोलिसांच्या या कारवाईचे परिसरात स्वागत होत आहे.
