जळगाव(प्रतिनिधी ):जिल्ह्यात वाढत्या वाहन चोरीच्या घटनांना आळा घालण्यासाठी जिल्हा पोलीस अधीक्षकांच्या आदेशानुसार मुक्ताईनगर पोलिसांनी मोठी कारवाई करत ३० चोरीच्या मोटारसायकली जप्त केल्या आहेत. जप्त वाहनांची अंदाजे किंमत २५ लाख ८० हजार रुपये असून या प्रकरणात दोन आरोपींसह दोन अल्पवयीन संशयितांना ताब्यात घेण्यात आले आहे.
मुक्ताईनगर पोलीस ठाण्यात दिनांक २६ जून २०२६ रोजी दाखल झालेल्या गुन्हा क्रमांक २७३/२०२६ (भारतीय न्याय संहिता कलम ३०३(२)) च्या तपासादरम्यान तांत्रिक माहितीचे विश्लेषण आणि गुप्त माहितीच्या आधारे पोलिसांनी विशाल सुरेश सोनवणे (रा. पिंपरुड, ता. यावल), कुंदन सुनिल महाले (रा. सालबर्डी, ता. मुक्ताईनगर) तसेच दोन अल्पवयीन संशयितांना ताब्यात घेतले.
चौकशीदरम्यान संशयितांनी सदर गुन्ह्यासह एकूण ३० मोटारसायकली चोरी केल्याची कबुली दिली. चोरी केलेल्या मोटारसायकली विविध रेल्वे स्थानके आणि बसस्थानकांवरील **’पे अँड पार्क’**मध्ये उभ्या करून तेथूनच ग्राहकांना विक्री केली जात असल्याची माहिती तपासात समोर आली.
जप्त करण्यात आलेल्या मोटारसायकली महाराष्ट्रातील विविध जिल्ह्यांमध्ये नोंदणीकृत असून, या वाहनांबाबत गुजरातमधील उधना (सुरत) तसेच कल्याण, नेरुळ, निफाड, वणी, इगतपुरी, गंगापूर, ओझर, सरकारवाडा, नेरळ, पारोळा, जिल्हापेठ आणि एरंडोल पोलीस ठाण्यांमध्ये गुन्हे दाखल असल्याचे निष्पन्न झाले आहे.
ही कारवाई जिल्हा पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी केदार बारबोले यांच्या मार्गदर्शनाखाली पोलीस निरीक्षक आशिष आडसूळ यांच्या नेतृत्वाखाली मुक्ताईनगर पोलीस ठाण्याच्या पथकाने यशस्वीरीत्या पार पाडली.
