जळगाव( प्रतिनिधी):
जळगाव शहरातील शिवाजीनगर परिसरात झालेल्या घरफोडीचा गुन्हा अवघ्या पाच तासांत उघडकीस आणत जळगाव शहर पोलीस ठाण्याच्या गुन्हे शोध पथकाने उल्लेखनीय कामगिरी केली आहे. या प्रकरणी दोन अट्टल चोरांना अटक करण्यात आली असून त्यांच्याकडून चोरीस गेलेला सुमारे ६३ हजार रुपयांचा मुद्देमाल हस्तगत करण्यात आला आहे.
जिल्ह्यात वाढत्या घरफोडी व चोरीच्या घटनांच्या पार्श्वभूमीवर पोलीस अधीक्षक श्रीकांत धिवरे यांच्या आदेशानुसार, अपर पोलीस अधीक्षक संदीप गावीत व उपविभागीय पोलीस अधिकारी नितीन गणापुरे यांच्या मार्गदर्शनाखाली जळगाव शहर पोलीस ठाण्याचे निरीक्षक सागर शिंपी यांनी गुन्हे शोध पथकाला विशेष सूचना दिल्या होत्या.
दरम्यान, २५ जून रोजी रात्री १० ते २६ जून रोजी सकाळी ७ वाजेदरम्यान शिवाजीनगर येथील सुशील भाईलाल भावसार (वय ६१) यांच्या घरात घरफोडी झाली. चोरट्यांनी डेल कंपनीचा लॅपटॉप, सॅमसंगचा मोबाईल, नोकिया अँड्रॉइड मोबाईल, पितळी कळशी व तीन हजार रुपये रोख असा एकूण ६३ हजार रुपयांचा ऐवज लंपास केला होता. याप्रकरणी जळगाव शहर पोलीस ठाण्यात गुन्हा दाखल करण्यात आला.
तपासादरम्यान मिळालेल्या गुप्त माहितीनुसार पोलिसांनी राफत शेख फिरोज (वय २०, रा. गेंदालाल मिल, जळगाव) आणि शेख शारीम शेख मुसेफ उर्फ मुसाब (वय २०, रा. सिंहगड, शिवाजीनगर हुदको, जळगाव) यांना ताब्यात घेतले. चौकशीत दोघांनी चोरीची कबुली दिल्यानंतर त्यांना अटक करण्यात आली.
आरोपींकडून चोरीस गेलेला डेल लॅपटॉप, सॅमसंग मोबाईल, नोकिया अँड्रॉइड मोबाईल, पितळी कळशी आणि तीन हजार रुपये रोख असा संपूर्ण मुद्देमाल जप्त करण्यात आला.
ही कारवाई पोलीस निरीक्षक सागर शिंपी यांच्या मार्गदर्शनाखाली गुन्हे शोध पथकातील सुनिल पाटील, दीपक शिरसाट, उमेश भांडारकर, सतीश पाटील, विरेंद्र शिंदे, योगेश पाटील, नंदलाल पाटील, भगवान पाटील, अमोल ठाकूर, राहुलकुमार पांचाळ, प्रणय पवार आणि भगवान मोरे यांनी केली.
