जळगाव(प्रतिनिधी):
जळगाव तालुक्यातील खेडी खुर्द गावाजवळ गिरणा नदीपात्रातून अवैधरीत्या वाळू उपसा व वाहतूक करणाऱ्यांविरोधात महसूल व पोलिस प्रशासनाने संयुक्त कारवाई करत १७ लाख ५० हजार रुपये किमतीची सहा वाहने जप्त केली. या प्रकरणी सात जणांविरुद्ध जळगाव तालुका पोलीस ठाण्यात गुन्हा दाखल करण्यात आला आहे.
२५ जून रोजी रात्री साडेदहा वाजण्याच्या सुमारास ही कारवाई करण्यात आली. यामध्ये स्वराज ७४४ एफई ट्रॅक्टर, टाटा १६१३ डंपर, अशोक लेलँड डंपर, टाटा ट्रक तसेच अन्य दोन डंपर अशी एकूण सहा वाहने जप्त करण्यात आली. जप्त वाहनांची एकूण किंमत सुमारे १७ लाख ५० हजार रुपये असल्याचे महसूल विभागाने सांगितले.
या प्रकरणी सतीश एकनाथ कुंभार, गणेश संजय कोळी, अब्दुल करीम शेख, रविंद्र गिरधर जाधव, रितेश अनिल कोळी, विशाल सुनील सपकाळे आणि भूषण सपकाळे यांच्याविरुद्ध भारतीय न्याय संहिता (बीएनएस) कलम ३०३(२), ४९, ५४ व ६२ अन्वये गुन्हा दाखल करण्यात आला आहे.
पोलिसांच्या माहितीनुसार, आरोपी आर्थिक फायद्याच्या उद्देशाने गिरणा नदीपात्रातून बेकायदेशीरपणे वाळूचा उपसा करून त्याची वाहतूक करत होते. कारवाईची चाहूल लागताच संबंधितांनी वाहने घटनास्थळी सोडून पळ काढला. जप्त वाहने ताब्यात घेऊन पुढील तपास पोलीस हेड कॉन्स्टेबल योगेश देविदास पाटील करीत आहेत.
