जळगाव(प्रतिनिधी: इमरान खान):एमआयडीसी पोलीस ठाण्याच्या गुन्हे शोध पथकाने मेहरूण तलाव परिसरात गावठी कट्टा बाळगणाऱ्या एका तरुणाला अटक करत त्याच्याकडून सुमारे १० हजार रुपये किमतीचा गावठी कट्टा जप्त केला आहे.
पोलीस उपनिरीक्षक चंद्रकांत धनके यांना गोपनीय माहिती मिळाली होती की, मेहरूण तलाव परिसरात एक व्यक्ती विनापरवाना गावठी कट्टा बाळगून फिरत असून दहशत माजवत आहे. ही माहिती पोलीस निरीक्षकांना देण्यात आल्यानंतर त्यांच्या सूचनेनुसार गुन्हे शोध पथकाने तातडीने सापळा रचला.
पथकाने मेहरूण ट्रॅक परिसरातील सुबोनिया पक्षीघराजवळ संशयिताला पाहिले. पोलिसांनी थांबण्याचा इशारा करताच तो पळून जाण्याचा प्रयत्न करू लागला. मात्र पोलीस कर्मचारी गणेश ठाकरे व रमाकांत साळुंखे यांनी पाठलाग करून त्याला जागीच पकडले.
चौकशीत त्याने आपले नाव समीर खान जावेद खान (वय २५, रा. बिलाल चौक, तांबापुरा, जळगाव) असे सांगितले. त्याची अंगझडती घेतली असता त्याच्याकडून मॅगझीनसह सुमारे १० हजार रुपये किमतीचा गावठी कट्टा जप्त करण्यात आला.
याप्रकरणी एमआयडीसी पोलीस ठाण्यात गुन्हा क्रमांक ५७३/२०२६ अन्वये भारतीय शस्त्र अधिनियमाच्या कलम ३/२५ अंतर्गत गुन्हा दाखल करण्यात आला असून पुढील तपास सहाय्यक फौजदार विजयसिंग पाटील करीत आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे आणि एमआयडीसी पोलीस ठाण्याचे पोलीस निरीक्षक बबन आव्हाड यांच्या मार्गदर्शनाखाली पोलीस उपनिरीक्षक चंद्रकांत धनके व गुन्हे शोध पथकाने केली.
