पारोळा (प्रतिनिधी) : तालुक्यातील पिंपरखेड येथील मारोती मंदिरातील चांदीचे मुकुट व कानातील चांदीच्या मासोळ्या चोरीप्रकरणी पारोळा पोलिसांनी अवघ्या काही दिवसांत गुन्ह्याचा छडा लावत आरोपीला अटक केली असून चोरीस गेलेला सुमारे ६५ हजार रुपयांचा मुद्देमाल हस्तगत करण्यात आला आहे.
पोलिसांनी दिलेल्या माहितीनुसार, दि. ८ जून २०२६ रोजी रात्री सुमारे ९.३० वाजेच्या सुमारास एक अनोळखी इसम पिंपरखेड येथील मारोती मंदिरात आला होता. काही वेळ मंदिरात थांबून दर्शन घेतल्यानंतर तो निघून गेला. त्यानंतर मंदिराचे पुजारी आसाराम त्र्यंबक पाटील (रा. बहादरपूर, ता. पारोळा) यांनी मंदिर बंद करून विश्रांती घेतली.
दि. ९ जून रोजी सकाळी साडेपाच वाजता मंदिराची साफसफाई करत असताना मारोती मूर्तीवरील सुमारे ५०० ग्रॅम वजनाचा चांदीचा मुकुट आणि कानातील सुमारे १५० ग्रॅम वजनाच्या चांदीच्या मासोळ्या गायब असल्याचे त्यांच्या निदर्शनास आले. चोरीस गेलेल्या मुद्देमालाची किंमत सुमारे ६५ हजार रुपये असल्याची फिर्याद पारोळा पोलीस ठाण्यात दाखल करण्यात आली. याप्रकरणी भारतीय न्याय संहिता कलम ३०५ अन्वये गुन्हा नोंदविण्यात आला होता.
गुन्ह्याचा तपास करताना सहाय्यक पोलीस निरीक्षक योगेश महाजन यांच्या मार्गदर्शनाखालील पथकाने मंदिरातील सीसीटीव्ही फुटेजची तपासणी केली. तसेच गोपनीय माहितीच्या आधारे संशयितांचा शोध घेतला. तपासादरम्यान हिरापूर (ता. पारोळा) येथील हिरालाल अरुण पाटील यास ताब्यात घेण्यात आले.
चौकशीदरम्यान आरोपीने दि. ८ जूनच्या रात्री पिंपरखेड मारोती मंदिरातून चांदीचा मुकुट व कानातील चांदीच्या मासोळ्या चोरी केल्याची कबुली दिली. त्यानंतर आरोपीच्या राहत्या घरातून चोरीस गेलेला संपूर्ण मुद्देमाल जप्त करण्यात आला. पोलिसांनी आरोपीला अटक केली असून पुढील तपास पोलीस हवालदार कैलास साळुंखे करीत आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक अशोक नखाते आणि एसडीपीओ अमळनेर विभाग विनायक कोते यांच्या मार्गदर्शनाखाली सहाय्यक पोलीस निरीक्षक योगेश महाजन, पोलीस हवालदार कैलास साळुंखे, संदीप सातपुते तसेच पथकातील अजय बाविस्कर, आकाश माळी, सुनील पाटील, अभिजित पाटील, गिरीश सोनवणे व अनिल राठोड यांनी यशस्वीरीत्या पार पाडली. पोलिसांच्या तत्पर तपासामुळे मंदिर चोरीचा गुन्हा उघडकीस आला असून स्थानिक नागरिकांनी पोलिसांच्या कामगिरीचे कौतुक केले आहे.
