जळगाव (प्रतिनिधी: हिरालाल राजपूत): जिल्ह्यात अवैध वाळू वाहतुकीला आळा घालण्यासाठी जळगाव शहर वाहतूक शाखेने प्रभावी कारवाई केली आहे. तरसोद फाट्यावरील पुलावर विशेष गस्तीदरम्यान अवैध वाळू वाहतूक करणारा सहा टायरचा डंपर पोलिसांनी पकडला. या कारवाईत तीन ब्रास वाळूसह एकूण ३ लाख १० हजार रुपयांचा मुद्देमाल जप्त करण्यात आला आहे.
दि. ३ नोव्हेंबर २०२६ रोजी रात्री १२.१५ वाजेच्या सुमारास पोलीस निरीक्षक मोरेश्वर पेंदाम हे पोलीस कर्मचाऱ्यांसह जिल्ह्यात विशेष गस्त घालत असताना तरसोद फाट्यावरील पुलावरून जळगावकडून भुसावळकडे जाणारा पिवळ्या रंगाचा सहा टायरचा डंपर (क्र. WB 29 A 5591) संशयावरून थांबविण्यात आला. तपासणी केली असता डंपरमध्ये तीन ब्रास वाळू आढळून आली.
पोलिसांनी १० हजार रुपये किमतीची वाळू आणि ३ लाख रुपये किमतीचा डंपर असा एकूण ३ लाख १० हजार रुपयांचा मुद्देमाल जप्त केला. याप्रकरणी चालक मोहन नथ्थू धामोडे (वय २४) आणि डंपर मालक पवन कैलास कोळी (वय २६, दोघे रा. संभाजीनगर, साकेगाव, ता. भुसावळ) यांच्याविरुद्ध नशिराबाद पोलीस ठाण्यात गुन्हा रजिस्टर क्रमांक २९४/२०२६ नुसार भारतीय न्याय संहिता कलम ३०३(२) तसेच मोटार वाहन कायद्याच्या कलम १३०/१७७ आणि ३/१८१ प्रमाणे गुन्हा दाखल करण्यात आला आहे.
दरम्यान, यापूर्वी २ सप्टेंबर २०२६ रोजीही विशेष गस्तीदरम्यान वैजनाथ, ता. एरंडोल येथील विलास भिवा पाटील (वय ५४) हा ट्रॅक्टरद्वारे नदीकिनारी वाळू खाली करताना आढळून आला होता. त्याच्याविरुद्ध धरणगाव पोलीस ठाण्यात गुन्हा क्रमांक ३०७/२०२६ नुसार भारतीय न्याय संहिता कलम ३०३(२) प्रमाणे गुन्हा दाखल करण्यात आला आहे.
अवैध वाळू उपसा व वाहतुकीविरोधात यापुढेही कठोर कारवाई सुरू राहणार असल्याचा इशारा पोलिसांनी दिला आहे. तसेच वाळूमाफियांना पोलीस व महसूल प्रशासनाच्या हालचालींची माहिती पुरविणाऱ्या व्यक्तींवरही लक्ष ठेवून योग्य ती कायदेशीर कारवाई करण्यात येणार असल्याचे स्पष्ट करण्यात आले आहे.
ही कारवाई पोलीस अधीक्षक, अपर पोलीस अधीक्षक आणि उपविभागीय पोलीस अधिकारी, जळगाव विभाग यांच्या मार्गदर्शनाखाली पोलीस निरीक्षक मोरेश्वर पेंदाम व त्यांच्या पथकाने केली. या पथकात पोलीस नाईक शशिकांत तायडे, पोलीस अंमलदार अमोल घुगे, नितीन पाटील, मिलिंद पाटील, गणेश घुगे आणि शुद्धोधन ढवळे यांचा समावेश होता.
