गेवराई (प्रतिनिधी: मोसिम शेख) : आगामी सण-उत्सवांच्या पार्श्वभूमीवर बीड जिल्ह्यात अवैध धंद्यांविरोधात पोलिसांनी धडक मोहीम सुरू केली असून, गेवराई पोलिसांनी मोठी कारवाई करत अवैध दारू वाहतूक करणाऱ्या आरोपीला अटक केली आहे. या कारवाईत स्विफ्ट कारसह एकूण ६ लाख ८ हजार रुपयांचा मुद्देमाल जप्त करण्यात आला आहे.
बीड जिल्ह्याचे पोलीस अधीक्षक नवनीत काँवत यांनी आगामी सण-उत्सवांच्या पार्श्वभूमीवर जिल्ह्यातील अवैध धंद्यांवर कठोर कारवाई करण्याचे आदेश दिले होते. त्या अनुषंगाने गेवराई पोलीस ठाण्याचे पोलीस निरीक्षक किशोर पवार यांनी विशेष पथकाची स्थापना करून तालुक्यात अवैध धंद्यांविरोधात मोहीम सुरू केली आहे.
दरम्यान, पोलिसांना मिळालेल्या गोपनीय माहितीनुसार गेवराई शहर परिसरात अवैध दारूची वाहतूक होत असल्याची माहिती मिळाली. त्यानुसार पोलिसांनी सापळा रचून स्विफ्ट कार अडवून तपासणी केली असता वाहनातून मोठ्या प्रमाणात अवैध दारूचा साठा आढळून आला. पोलिसांनी तत्काळ कारवाई करत वाहनासह दारू जप्त केली आणि आरोपीला ताब्यात घेतले.
या कारवाईत स्विफ्ट कार, अवैध दारूचा साठा असा एकूण ६,०८,००० रुपयांचा मुद्देमाल जप्त करण्यात आला असून आरोपीविरुद्ध संबंधित कलमान्वये गुन्हा दाखल करण्यात आला आहे. पुढील तपास गेवराई पोलीस करीत आहेत.
