- जळगाव (प्रतिनिधी): शहरातील हरी विठ्ठल नगर परिसरातून एक धक्कादायक घटना समोर आली असून १७ वर्षीय अल्पवयीन मुलाला अज्ञात व्यक्तीने अमिष दाखवून फूस लावून पळवून नेल्याचा प्रकार उघडकीस आला आहे. या प्रकरणी रामानंदनगर पोलीस ठाण्यात अज्ञात व्यक्तीविरुद्ध अपहरणाचा गुन्हा दाखल करण्यात आला असून परिसरात चिंतेचे वातावरण निर्माण झाले आहे.
- मिळालेल्या माहितीनुसार, कमलाबाई कैलास पावरा (वय ४०) या मूळ मध्य प्रदेशातील असून सध्या जळगाव शहरातील हरी विठ्ठल नगर परिसरात कुटुंबासह वास्तव्यास आहेत. त्या आपल्या पतीसह सोप संदीप अपार्टमेंट येथे वॉचमन म्हणून काम करतात. त्यांचा मुलगा पुनित कैलास पावरा (वय १७ वर्षे ११ महिने २२ दिवस) हा गुरुवार, २१ मे २०२६ रोजी दुपारी साडेतीन वाजेच्या सुमारास अचानक बेपत्ता झाला.
- कुटुंबीयांनी पुनितचा परिसरात तसेच नातेवाईकांकडे शोध घेतला. मात्र, त्याचा कोणताही ठावठिकाणा लागला नाही. अखेर मुलगा सापडत नसल्याने आई कमलाबाई पावरा यांनी रविवारी, २४ मे रोजी रामानंदनगर पोलीस ठाण्यात धाव घेत तक्रार दाखल केली.
- तक्रारीवरून रामानंदनगर पोलीस ठाण्यात गुन्हा रजिस्टर क्रमांक १६६/२०२६ नुसार भारतीय न्याय संहिता (BNS) २०२३ च्या कलम १३७(२) अंतर्गत अज्ञात व्यक्तीविरुद्ध अपहरणाचा गुन्हा दाखल करण्यात आला आहे.
- घटनेचे गांभीर्य लक्षात घेऊन पोलीस निरीक्षक राजेंद्र गुंजाळ यांच्या मार्गदर्शनाखाली तपास सुरू करण्यात आला असून पोलीस उपनिरीक्षक संजय शेलार हे या प्रकरणाचा पुढील तपास करत आहेत.
जळगावातून १७ वर्षीय अल्पवयीन मुलाचे अपहरण; रामानंदनगर पोलिसांत गुन्हा दाखल
संपादक - रजत शेख
