जळगाव (प्रतिनिधी):
लाचलुचपत प्रतिबंधक विभाग च्या पथकाने जळगावात मोठी कारवाई करत अवैध सावकारी प्रकरणातील चौकशी अहवाल अनुकूल पाठविण्यासाठी लाच मागितल्याप्रकरणी उपनिबंधकासह एका खासगी इसमाला जाळ्यात अडकविले. या कारवाईमुळे सहकार विभागात एकच खळबळ उडाली आहे.
मिळालेल्या माहितीनुसार, तक्रारदारांविरुद्ध अवैध सावकारी व्यवसायासंदर्भात चौकशी सुरू होती. या चौकशीचा अहवाल अनुकूल पाठवून तक्रारदार व त्यांच्या पत्नीवर गुन्हा दाखल होऊ नये यासाठी उपनिबंधक सह संस्था, जळगाव येथील जगदीश बारी यांनी सुरुवातीला तब्बल ५ लाख रुपयांची लाच मागितली होती. नंतर तडजोडीअंती ही रक्कम ३ लाख रुपयांवर निश्चित करण्यात आली.
तक्रारदारांनी याबाबत १८ मे २०२६ रोजी जळगाव ACB कडे तक्रार दाखल केली होती. त्यानंतर ACB ने पंचांसमक्ष पडताळणी केली असता लाचेची मागणी झाल्याचे निष्पन्न झाले. पडताळणीदरम्यान उपनिबंधक जगदीश बारी यांनी “मागील प्रकरणात तुम्ही वकील लावल्यामुळे आमचे नुकसान झाले, त्यामुळे नकारात्मक अहवाल दिला होता; आता अनुकूल अहवाल पाठवितो,” असे सांगत लाचेची मागणी कायम ठेवली होती.
दरम्यान, ठरल्याप्रमाणे लाचेच्या रकमेतील पहिला हप्ता म्हणून १ लाख ५० हजार रुपये खाजगी इसम देविदास पाटील (मानद कार्यकारी अधिकारी, जळगाव जिल्हा बँक असोसिएशन) यांच्याकडे २० मे रोजी देण्याचे ठरले होते.
यानुसार ACB ने बी. जे. मार्केट परिसरातील जळगाव जिल्हा अर्बन को-ऑपरेटिव्ह बँक्स असोसिएशनच्या कार्यालयात सापळा रचला. यावेळी देविदास पाटील हे तक्रारदारांकडून १ लाख ५० हजार रुपयांची लाचेची रक्कम स्वीकारताना रंगेहात पकडण्यात आले.
ही कारवाई जळगाव ACB चे पोलीस उपअधीक्षक योगेश ठाकूर, पोलीस निरीक्षक रेश्मा अवतारे, पोलीस निरीक्षक हेमंत नागरे, पोहेकॉं. बालू मराठे, मपोहेकॉं. संगीता पवार, पोलीस कॉन्स्टेबल मनोज पाटील आणि पोलीस कॉन्स्टेबल सचिन चाटे यांच्या पथकाने केली.
