मेहरून (प्रतिनिधी): संत ज्ञानेश्वर विद्यालय, मेहरून येथे “हिंद दी चादर” उपक्रमांतर्गत राष्ट्रीय एकात्मता व सांस्कृतिक विविधता या विषयावर भित्तीपत्रक निर्मिती स्पर्धा मोठ्या उत्साहात पार पडली. विद्यार्थ्यांनी विविध धर्म, भाषा, पोशाख, सण-परंपरा आणि भारतीय संस्कृतीतील वैशिष्ट्यांचे आकर्षक व कल्पक चित्रण करत “विविधतेत एकता” हा संदेश प्रभावीपणे सादर केला.
स्पर्धेत सादर करण्यात आलेल्या भित्तीपत्रकांमध्ये रंगसंगती, समर्पक घोषवाक्ये, सर्जनशील मांडणी आणि सामाजिक संदेश यांचा सुंदर मिलाफ दिसून आला. प्रत्येक विद्यार्थ्याच्या कलाकृतीतून देशप्रेम, बंधुभाव आणि परस्पर आदराची भावना प्रकर्षाने जाणवली.
या उपक्रमाचा मुख्य उद्देश विद्यार्थ्यांमध्ये राष्ट्रीय एकात्मतेची जाणीव दृढ करणे, सामाजिक सौहार्द वाढविणे आणि सृजनशीलतेला प्रोत्साहन देणे हा होता. मुख्याध्यापकांनी विद्यार्थ्यांचे कौतुक करत अशा उपक्रमांमुळे मुलांमध्ये सामाजिक बांधिलकीची जाणीव निर्माण होते तसेच त्यांच्या कलागुणांना योग्य व्यासपीठ मिळते, असे मत व्यक्त केले.
स्पर्धेत अंकिता फुलचंद यादव हिने प्रथम क्रमांक, तर खुशी ज्ञानेश्वर मोरे हिने द्वितीय क्रमांक पटकावला. या स्पर्धेमुळे विद्यालयात आनंदी, प्रेरणादायी आणि सकारात्मक वातावरण निर्माण झाले.
